Aqtóbedegi iri sý qoımalarynyń teń jartysynan astamy bos tur
AQTÓBE. KAZINFORM — Qarǵaly, Sazdy, Aqtóbe sý qoımalary sý qabyldaýǵa daıyn. Úsheýinde 300 mln tekshe metrden astam bos oryn bar.
Aqtóbe oblysy ákimdiginiń habarlaýynsha, Aqtóbe sý qoımasynda 58% nemese 141 mln tekshe metr, Qarǵaly sý qoımasynda 68% nemese 192 mln tekshe metr, al Sazdy sý qoımasynda 61%, ıaǵnı 4,5 mln tekshe metrden astam bos syıymdylyq bar. Buǵan deıin úsh sý qoımasy da tekserýden ótken ári qaýipsizdik deklaratsııasy ázirlendi.
— Tasqyn qaýpiniń aldyn alýǵa jáne onyń saldaryn azaıtýǵa baǵyttalǵan keshendi sharalar turaqty túrde júrgizip keledi. Strategııalyq mańyzy bar nysandarda táýlik boıy kezekshilik uıymdastyrylyp, rejımdik jáne kúzet sharalary qamtamasyz etilgen. Barlyq sý sharýashylyǵy nysanynda ınertti materıaldar daıyndalǵan, sondaı-aq janar-jaǵarmaı qory bar rezervtik dızel generatorlar qarastyrylǵan. Qazirgi ýaqytta barlyq sý qoımasy shtattyq rejımde jumys istep tur, sý sharýashylyǵy jaǵdaıy turaqty baqylaýda, — dedi «Qazsýshar» RMK Aqtóbe oblysyndaǵy fılıal dırektory Rınat Shaýenov.
Sonymen qatar úsh sý qoımasynda da Aqtóbe oblystyq tótenshe jaǵdaılar departamentiniń ortalyq basqarý pýltine biriktirilgen jergilikti habarlaý júıesi jumys isteıdi. Qosymsha radıostantsııalar satyp alyndy.
Buǵan deıin habarlaǵanymyzdaı, Aqtóbede kóktemgi sý tasqyny kezeńine 2 myńnan astam adam, 800-den astam tehnıka daıyn. 400-den astam motopompa, 105 júzý quraly bar.