Aqtóbedegi iri sý qoımalarynda sý qory qansha
AQTÓBE. KAZINFORM — Aqtóbe sý qoımasynda 32%, Qarǵalyda 28%, al Sazdyda 21% sý qory bar. Mamyr-qyrkúıek aılary aralyǵynda úsh sý qoımasynan 60 mln tekshe metrge jýyq sý jiberildi.
«Qazsýshar» RMK Aqtóbe fılıaly Aqtóbe, Qarǵaly jáne Sazdy sý qoımalaryna baqylaý jumysyn júrgizedi jáne sharýalarǵa sý jiberip otyrady. Eń úlkeni — Aqtóbe sý qoımasy. Syıymdylyǵy — 245 mln tekshe metr. Qazirgi kezde sý qoımasynda 78,86 mln tekshe metr sý qory bar. Bul syıymdylyqtyń 32%-na teń.
— Sý tasqynynyń basynda Aqtóbe sý qoımasyndaǵy sý kólemi 100 mln tekshe metr boldy. «Qazgıdromet» RMK-nyń 110-242 mln tekshe metr sý keledi dep boljaǵanymen tek 55 mln tekshe metr sý quıyldy. Sý qoımasy tek jınaqtaý rejıminde jumys istedi. Sonymen birge Elek ózeniniń tepe-teńdigin saqtaý jáne ekologııalyq jaǵdaıyn jaqsartý úshin sol kezde 52,27 mln tekshe metr sý jiberildi. Al Qarǵaly ózenindegi Qarǵaly sý qoımasynyń syıymdylyǵy — 280 mln tekshe metr. Qazirgi kezde sýdyń naqty kólemi 78,23 mln tekshe metr bolyp tur. Bul syıymdylyqtyń 28% quraıdy. Sý tasqyny kezeńinde 87 mln tekshe metr sý boldy. Tasqyn kezinde oǵan qosymsha 35 mln tekshe metr sý jınaldy. Sazdy sý qoımasynyń syıymdylyǵy — 7,5 mln tekshe metr. Qazirgi kezde sý qoımasynda tek 1,57 mln tekshe metr sý bar, — dedi «Qarsýshar» RMK AOF dırektorynyń orynbasary Tımýr Tleýov.
Bıyl mamyr-maýsym aılarynda Aqtóbe oblysy aýmaǵynda jaýyn-shashyn mol tústi. Sol kezde Sazdy sý qoımasyna 6 mln tekshe metr sý jınaldy. Ári eki aıda sý qoımasynan sý jiberilmedi.
Aıta keteıik, Aqtóbe oblysy boıynsha Aqtóbe jáne Sazdy sý qoımalaryna jóndeý júrgizildi. Qarǵaly sý qoımasyn rekonstrýktsııalaý úshin jobalaý-smetalyq qujattama ázirlenip, memlekettik saraptamaǵa jiberildi.
— Strategııalyq mańyzy bar sý qoımalaryn qaýipsiz paıdalaný maqsatynda sońǵy 20 jylda alǵash ret kópfaktorly zerttep-qaraý júrgizilip, qaýipsizdik deklaratsııalary ázirlendi. Tótenshe jaǵdaılardyń aldyn alý maqsatynda eskertý sıpatyndaǵy is-sharalar keshenin júrgizdi. Strategııalyq mańyzy bar obektilerde rejımdik jáne kúzet is-sharalary, táýlik boıy kezekshilik uıymdastyryldy, — dedi «Qarsýshar» RMK AOF dırektorynyń orynbasary Tımýr Tleýov.
Aıta keteıik, Qazaqstan men Reseı transshekaralyq sý nysandaryn birlesip paıdalaný máselecin talqylady. Onda Jaıyq, Ertis jáne basqa da iri transshekaralyq ózender basseınderinde zertteýler júrgizýge arnalǵan Biryńǵaı jol kartasyn iske asyrýǵa, sondaı-aq Qaraózen men Saryózenniń sý sharýashylyǵy balansyn ázirleýge erekshe nazar aýdaryldy.
