Aqtóbedegi óńiraralyq patrýldeý kezinde 500-den astam zańbuzýshylyq anyqtaldy
AQTÓBE. KAZINFORM — Astana men Qaraǵandy qalalarynan qosymsha kúsh keldi. Joldaǵy qaýipsizdikti baqylaý kezinde tranzıttik kólik te aıyp turaǵyna qoıyldy.
Polıtsııa 17–25 mamyr aralyǵynda «Qaýipsiz jol» respýblıkalyq is-sharasyn ótkizedi. Sol úshin Aqtóbege Astana men Qaraǵandydan patrýl keldi. Óńiraralyq patrýldeý kezinde joldaǵy qaýipsizdik nazarda bolady.
— Aýqymdy reıdtik is-shara buǵan deıin elimizdiń ózge óńirlerinde de nátıjeli ótkizilgen. Іs-sharanyń alǵashqy kúninde 500-den astam buzýshylyq anyqtaldy. Onyń ishinde 8 júrgizýshi kólikti mas kúıinde basqarǵan, 60 júrgizýshi qaýipsizdik beldigin taqpaǵan, 18 júrgizýshiniń júrgizýshi kýáligi bolmaǵan. Sonymen birge 6 júrgizýshi baǵdarshamnyń tyıym salynǵan belgisine ótken, al 24 júrgizýshi kólik júrgizý kezinde uıaly telefon paıdalanǵan. Mamandandyrylǵan aıyp turaǵyna 50 kólik quraly qoıyldy, onyń 12-si tranzıttik memlekettik tirkeý nómirimen júrgen avtokólik, — dedi Aqtóbe oblysy PD ÁPB bastyǵy Erkin Ótegen.
Aıta keteıik, mamyr aıynyń 11-de Túrkistanǵa 4 óńirden patrýldik polıtsııa qyzmetkerleri kómekke bardy.
