Aqtóbedegi oqýshylar qaza bolǵan jol apaty: Oblys ákimi isti óz baqylaýyna aldy

Aqtóbe oblysynyń ákimi Ashat Shaharov jol-kólik apatyna qatysty isti óz baqylaýyna aldy. Onyń aıtýynsha, kináliler zań aıasynda jaýapqa tartylady, dep habarlaıdy Kazinform.

Jol-kólik apatynan soń oblys ákimi Ashat Shaharov áleýmettik jeli arqyly óz pikirin bildirdi.

— Búgin oblysymyzda jantúrshigerlik oqıǵa boldy. Yrǵyz aýdanynda kólik apatynan úsh adam kóz jumdy. Onyń ekeýi — respýblıkalyq olımpıadanyń aýdandyq kezeńine bara jatqan oqýshylar.
Bul — orny tolmas qaıǵy. Órimdeı jas balalardyń ómirin jalmaǵan jol-kólik oqıǵasy eldi dúr silkindirdi. Óz tarapymnan qaza tapqandardyń týystary men jaqyndaryna qaıǵyra kóńil aıtamyn. Qazirgi tańda shuǵyl túrde qurylǵan jumys toby Yrǵyz aýdanyna jolǵa shyqty. Olar oqıǵanyń mán-jaıyn anyqtamaq. Zardap shekkenderge barlyq qajetti kómek pen qoldaý jan-jaqty kórsetiledi. Sondaı-aq, polıtsııa departamenti atalǵan fakti boıynsha sotqa deıingi tergeýdi bastady. Kináliler zań aıasynda jaýapqa tartylady. Bul jazataıym oqıǵa meniń jeke baqylaýymda bolady», — dep jazdy Aqtóbe oblysynyń ákimi Ashat Shaharov.

Búgin Aqtóbede olımpıadaǵa bara jatqan oqýshylar jol apatyna ushyrady. «Samara – Shymkent» tasjolynda bolǵan jol-kólik apatynan eki oqýshy men muǵalim qaza tapty. 

Qazirgi kezde úsh oqýshy aýrýhanada jatyr. Oqıǵadan soń eki qylmystyq is qozǵaldy.