Aqtóbedegi oqıǵa: qyzdy qutqaramyn dep ajal qushqan jigittiń artynda 6 balasy qaldy

ASTANA. KAZINFORM — Qaza bolǵan N.Berdiǵalıev Aqtóbe oblysy Baıǵanın balalar-jasóspirimder sport mektebinde jattyqtyrýshy bolǵan, dep habarlaıdy Aqtóbe oblysy ákiminiń baspasóz qyzmeti.

Oblys ákiminiń baspasóz qyzmeti qyzdy qudyqtan alyp shyqpaq bolyp qaza bolǵan azamat týraly aqparat taratty. Belgili bolǵandaı, N.Berdiǵalıev Baıǵanın balalar-jasóspirimder sport mektebinde jattyqtyrýshy bolǵan. Marqumnyń artynda alty balasy qaldy.

— N.Berdiǵalıev 2017 jyldyń qyrkúıek aıynan bastap Jarly aýylyna qonys aýdaryp, erkin kúres jattyqtyrýshy qyzmetin bastady. Sol ýaqyttan ómiriniń sońyna deıin 40-qa jýyq respýblıka, oblystyq deńgeıdegi jarystardyń júldegerleri men jeńimpazdaryn daıyndady. Sonymen qatar 20 shákirti Qazaqstan Respýblıkasynyń «Sport sheberligine úmitker» normatıvin oryndady. Onyń artynda 6 balasy qaldy, — delingen habarlamada.

Eske salsaq, 17 maýsymda Baıǵanın aýdanyna qarasty Kóltaban aýyldyq okrýgindegi Jarly aýylynda, úı aýlasynda ornalasqan tereńdigi shamamen 10 metr, qoqysqa toly qudyqqa 9 jastaǵy qyz bala qulap ketken. Balaqaıdy qutqarmaq bolǵan 1987 jyly týǵan er adam qudyqqa túsken, alaıda qaıta shyǵa almaǵan.