Aqtóbedegi neke saraıynda 26 jastaǵy áıeldi pyshaqtap óltirdi
ASTANA. KAZINFORM — Aqtóbede neke saraıynda 26 jastaǵy áıeldi pyshaqtap óltirdi. Qylmysqa onyń burynǵy kúıeýi kúdikti. Bul týraly Aqtóbe oblystyq polıtsııa departamenti málimdedi.
Oqıǵa búgin, 2026 jylǵy 3 qarashada bolǵan. Kýágerlerdiń aıtýynsha, ǵımarat ishinen aıqaılaǵan daýystar estilgen. Polıtsııa oqıǵa ornyna jetkende áıel qansyrap, edende jatqan. Dárigerler onyń ómirin saqtap qala almaǵan.
Oqıǵa kýágerleri qaıǵyly jaǵdaıdyń aldynda marqum men burynǵy kúıeýi arasynda janjal bolǵanyn aıtady. Olardyń sózinshe, er adam áıeldiń basqa azamatpen qarym-qatynasta bolǵanyna narazy bolǵan. Marqumnyń birneshe balasy bar ekeni de aıtyldy.
Polıtsııa kúdiktini qylmys bolǵannan keıin kóp uzamaı ustaǵan.
— Jedel-izdestirý sharalary barysynda kúdiktiniń kim ekeni anyqtalyp, izin sýytpaı qolǵa tústi. Qazir ol ýaqytsha ustaý ızolıatoryna qamaldy. Oqıǵanyń barlyq mán-jaıyn, sondaı-aq qylmystyń sebepteri men saldaryn anyqtaýǵa baǵyttalǵan qajetti tergeý áreketteri júrgizilip jatyr, — dep habarlady oblystyq polıtsııa departamenti.
Atalǵan derek boıynsha adam óltirý babymen qylmystyq is qozǵaldy.
Eske salaıyq, buǵan deıin Aqtóbede kópqabatty úıdiń aýlasynda áıeldi pyshaqtap ketkenin habarlaǵanbyz.
