Aqtóbedegi mýzykalyq kolledj stýdentteri Dımash Qudaıbergenniń týǵan kúnine syılyq jasady
AQTÓBE. KAZINFORM – A.Jubanov atyndaǵy Aqtóbe mýzykalyq kolledj stýdentteri ánshi Dımash Qudaıbergenniń repertýaryndaǵy ánderdi shyrqady. Onyń ustazy Marat Áıtimov beınequttyqtaýyn jetkizip, ánshiniń stýdent kúnindegi qyzyqtaryn aıtyp berdi.
Búgin ánshi Dımash Qudaıbergen 30 jasqa toldy. Týǵan kúnine oraı A.Jubanov atyndaǵy Aqtóbe mýzykalyq kolledj stýdentteri mýzykalyq kesh ótkizdi. Onda ánshiniń repertýaryndaǵy ánder oryndaldy.
- Dımashtyń repertýaryndaǵy «Qazaqstan» ánin kvartet bolyp oryndadyq. Patrıottyq sezimdi oıatyp, rýh beretin án bizge de unaıdy. Biz Dımashqa uqsatyp emes, óz boıaýymyzben shyrqap shyqtyq. Ózim ánshini kórmedim. Meniń oıymsha kolledj stýdentteriniń bári de onymen júzdeskisi keledi dep oılaımyn. Bizdiń kolledjde onyń aty jıi aıtylyp, qurmet kórsetiledi,- dedi kolledj stýdenti Gúlim Serik.
Dımash Qudaıbergen A.Jubanov atyndaǵy Aqtóbe mýzykalyq kolledjde Qazaqstannyń eńbek sińirgen qaıratkeri Marat Áıtimovten dáris aldy. Qazir ustazy onyń Túrkııada ótetin kontsertine qatysýǵa jolǵa shyqqan. Aqtóbedegi keshte onyń beınequttyqtaýy qosylyp, ánshiniń stýdent kúnderdegi qyzyqty oqıǵalary aıtyldy.
- Dımash 2010 jyly A.Jubanov atyndaǵy Aqtóbe mýzykalyq kolledjiniń Án salý bólimi Akademııalyq án salý mamandyǵyna qabyldandy. Dımashty kileń 5-ke oqydy dep aıta almaımyn. Ózine unaǵan pánderdi jaqsy oqydy, ózine unamaǵanyna janyn sala qoımady. Kileń 5-ke oqymasa da úlken jetistikterge jetkenin, jalǵyz biz emes, búkil álem moıyndap otyrǵanyn aıtýymyz kerek. Kezekti ret sabaqqa keshigip qalǵan kezde Mıýa apamyzǵa habarlasyp, «Apa, Dımash joq, oıatyńyz da, jiberińiz» degende, «Marat, ekeýlep júrip osy balany bitirteıik» dep aıtqany áli esimde. Eń bastysy adamǵa degen baýyrmaldyǵy, júreginiń eljirep turatyndyǵy, kómekteskisi kelip turatyny bar. Basqa balalardan aıyrmashylyǵy degenge óte tárbıeli, kóregendigi dep aıtar edim. Bergen ýádesin eshqashan umytpaıdy,- dedi ustazy Marat Áıtimov.
Kolledjde qazir 300-den astam stýdent bar. Munda álemniń birneshe elinen ánshiniń jankúıerleri kelip, bilim alǵan oqý ornyn kórip, ustazymen kezdesedi.
- Byltyr bir aıda álemniń 30 elinen jankúıerleri keldi. Bıyl da kelip jatyr. Kóbine kontsert, baıqaýlar kezinde keledi. Ustazy Marat Áıtimov Túrkııa elinde ótetin kontsertine ketti. Biz kolledj atynan arnaıy shapan tiktirip, syıymyzdy berip jiberdik. Jalpy ánshiniń týǵan kúninde biz osyndaı mádenı kesh uıymdastyramyz. Dástúrli shara shamamen 5-6 jyldan beri uıymdastyrylyp keledi,- dedi A.Jubanov atyndaǵy Aqtóbe mýzykalyq kolledji dırektorynyń mindetin atqarýshy Ádilet Kúzenbaev.
