Aqtóbedegi meıramhanada adamdardyń neden jappaı ýlanǵany belgili boldy
AQTÓBE. KAZINFORM — Meıramhanada sanıtarııalyq-epıdemıologııalyq, azyq-túlikti saqtaý talaptary saqtalmaǵan. Jumysshylary — stafılokokk ınfektsııasy bakterııasyn tasymaldaýshy.
Aqtóbe oblysynyń sanıtarııalyq-epıdemıologııalyq baqylaý departamenti «Tumar» meıramhanasyn tekserýdi aıaqtap, zertteý qorytyndysyn shyǵardy. Nátıjesinde meıramhana jumysshylary Staphylococcus aureus bakterııasyn tasymaldaýshy bolyp shyqty.
— As úı jabdyqtarynan alynǵan shaıyndylardan, taǵam ónimderinen jáne aýyz sý synamasynan ishek taıaqshalary tobynyń bakterııalary (ІTTB) anyqtaldy. Ol úshin mıkrobıologııalyq zerthanalyq zertteýler jasaldy. Zardap shekken azamattardan Staphylococcus aureus jáne ishek taıaqshalary tobynyń bakterııalary (ІTTB) anyqtaldy. Bul stafılokokkty taǵamdyq toksıkoınfektsııanyń jáne shartty-patogendi mıkrofloradan týyndaǵan jiti ishek ınfektsııalarynyń bolǵanyn kórsetedi, — dedi Muǵaljar aýdandyq sanıtarııalyq-epıdemıologııalyq baqylaý basqarmasynyń basshysy Erlan Muratov.
Epıdemıologtardyń habarlaýynsha, «Tumar» meıramhanasynda taǵam daıyndaý tehnologııasy buzylǵan, taǵam ónimderi men azyq-túlik shıkizatynyń qaýipsizdigin rastaıtyn qujattar bolmaǵan, dezınfektsııalyq rejım saqtalmaǵan. Sondaı-aq meıramhana qyzmetkerleri mindetti medıtsınalyq tekserýden ótpegen. Epıdemıologııalyq tekserýdiń qorytyndysy negizinde materıaldar Qylmystyq kodeksiniń 304-babynyń 1-bóligine sáıkes quqyq qorǵaý organdaryna joldandy.
Eske salsaq, 19 maýsymnan bastap Muǵaljar aýdandyq aýrýhanasy men oblystyq klınıkalyq juqpaly aýrýlar aýrýhanasyna ishek ınfektsııasynyń belgilerimen 102 naýqas medıtsınalyq kómekke júginip, aýrýhanaǵa jatqyzyldy.
Jappaı astan ýlaný faktisine qatysty QR Qylmystyq kodeksiniń 304-baby («Sanıtarııalyq qaǵıdalardy nemese gıgıenalyq normatıvterdi buzý») belgilerimen sotqa deıingi tergep-tekserý bastaldy.
Jalpy Muǵaljar aýdandyq sanıtarııalyq-epıdemıologııalyq baqylaý basqarmasyna barlyǵy 188 shuǵyl habarlama túsken. Astan ýlanǵandardyń 15-i bala. Olarǵa ortasha aýyr dárejede túsip, emdeldi.
