Aqtóbedegi medıtsınalyq ýnıversıtet rektory bas bostandyǵynan aıyryldy

AQTÓBE. KAZINFORM – Rektor Áset Qalıev Qylmystyq kodekstiń «Para alý» babymen kináli dep tanylyp, 8 jylǵa bas bostandyǵynan aıyryldy. Jazasyn qaýipsizdigi orta túzetý mekemesinde óteıdi. 

Marat Ospanov atyndaǵy Batys Qazaqstan medıtsınalyq ýnıversıtetiniń rektoryna Qylmystyq kodekstiń «Para alý» babymen aıyp taǵylyp, is Almaty oblysy Іle aýdandyq sotynda qaraldy. Al Inessa Mutyrǵanovaǵa «Para berý» baby boıynsha aıyp taǵyldy.

Іs materıalyna súıensek, Áset Qalıev 2022 jyly rektor qyzmetine taǵaıyndalady. Sol jyly qyrkúıek aıynda Á.Qalıev Inessa Mutyrǵanovaǵa «Samruk-Kazyna Trust» Qorynan qarjy surap, ýnıversıtettegi jańa bólimge medıtsınalyq qural-jabdyq satyp alatynyn, kommertsııalyq usynystaryn jiberýge bolatynyn aıtady. Eger Qor usynysty maquldap, qarjy bólse, óz kezeginde kelisimshartqa qol qoıýǵa ázir ekenin jetkizedi. Inessa Mutyrǵanova bárine kelisip, qural-jabdyq satyp alý týraly kommertsııalyq usynysyn beredi. Ekeýi para alý jáne para berý týraly kelisimdi Astana qalasynda ótken respýblıkalyq ǵylymı-praktıkalyq konferentsııa kezinde sheshti.

2023 jyldyń qyrkúıek aıynda «Samruk-Kazyna Trust» Qory ýnıversıtet rektory Áset Qalıevtiń ótinishin qarap, 249 100 700 teńge bólý týraly kelisimi jasalady. Bul qarjy obyr dertine shaldyqqan adamdardy ońaltýǵa arnalǵan bólimge qajetti qural-jabdyqtardy satyp alýǵa baǵyttalýy tıis. Keıin sottalýshy Áset Qalıev qordyń qarjy bólgenin, memlekettik satyp alý konkýrsyna habarlandyrý shyǵar ýaqytynyń belgili bolǵanyn aıtady. Inessa Mutyrǵanova ózi baqylap otyrǵan birneshe fırma atynan qujat tapsyryp, jeńimpaz atanady. Jalpy somasy 195 662 000 teńgeniń úsh kelisimsharty jasalady. Alaıda Á.Qalıev qarjynyń bir bóligin ýaqytyly aýdarmaǵan soń I. Mutyrǵanova Aqtóbe qalasyna keledi.

Sot kabınetindegi derekke súıensek, sol kezde 11 640 000 teńgeni alyp, qaladaǵy qonaqúı mańynda para beredi. Sot otyrysy kezinde sottalýshylar óz kinásin moıyndamady. Biri paket ishinde aqsha bar ekenin bilmegenin, al ekinshisi bul qarjynyń demeýshilik ekenin aıtty. 

Sot úkimimen Áset Qalıev Qylmystyq kodekestiń «Para alý» babymen aıypty dep tanylyp, 8 jylǵa bas bostandyǵynan aıyryldy. Ol jazasyn qaýipsizdigi orshata túzetý mekemesinde óteıdi. «Eren eńbegi úshin» medalinen aıyryldy. Inessa Mutyrǵanova «Para berý» baby boıynsha aıypty dep tanylyp, 8 jylǵa bas bostandyǵynan aıyryldy. Іstegi 11 640 000 teńge memleket kirisine berildi. 

Eske salsaq, Batys Qazaqstan medıtsına ýnıversıtetiniń rektory Áset Qalıev byltyr ustaldy. Tergeýdi Antıkor júrgizdi.