Aqtóbedegi konvert daýy: biri qyzmetten ketti, ekinshisi ákimdikte jumys istep júr
AQTÓBE. KAZINFORM – Áleýmettik jelide «Aqtóbe» ÁKK» AQ basqarma tóraǵasynyń birinshi orynbasary Rýslan Ájnııazov konvert berip, oblys ákiminiń orynbasary Ǵalymjan Eleýovtiń kómekshisi degen adamnyń ony alyp jatqan vıdeosy tarap, atalǵan oqıǵaǵa kópshilik arasynda qyzý talqyǵa túsken edi. Qazirgi kezde R. Ájnııazov óz erkimen qyzmetinen ketti, al oblys ákiminiń kómekshisi qyzmetin qaıta jalǵastyryp jatyr.
Vıdeodan «Aqtóbe» ÁKK» AQ basqarma tóraǵasynyń birinshi orynbasary qyzmetin atqarǵan Rýslan Ájnııazovtiń konvert sekildi zatty berip jatqanyn, al Ǵalymjan Eleýovtiń kómekshisi dep jazylǵan adamnyń ony alyp, qoınyna jasyrǵanyn kórýge bolady. Osy oqıǵadan keıin tekserý júrgizildi.
Arada bir aı ótkende qyzmettik tekserý qorytyndysy shyǵaryldy. Onda qyzmetkerlerden túsinikteme alynǵany, áleýmettik jelige jarııalanǵan aqparattyń rastalmaǵany týraly ǵana aqparat taratyldy.
– Aqtóbe» ÁKK» AQ basqarma tóraǵasynyń birinshi orynbasary qyzmetin atqarǵan Rýslan Ájnııazov sáýirde óz erkimen jumystan ketti. Tekserý qorytyndysy bolsa buǵan deıin aıtyldy. Ózge aqparat joq, - dedi «Aqtóbe» ÁKK» AQ baspasóz qyzmeti.
Aıta keteıik, Aqtóbe oblysy ákiminiń orynbasary Ǵalymjan Eleýovtiń kómekshisi dep atalǵan adam ol kezde ákimdikte bolmaǵan edi. Aqtóbe oblysy ákiminiń baspasóz qyzmetiniń habarlaýynsha, ol qazir Ǵalymjan Eleýovtiń shtattan tys kómekshisi bolyp qasynda júr. Al QR Sybaılas jemqorlyqqa qarsy is-qımyl agenttiginiń oblystyq departamenti qandaı da bir aqparat taratpady.
