Aqtóbedegi keıbir stansada temirjol vokzalyn jóndeý jumysy toqtap qaldy
AQTÓBE. KAZINFORM – Oblysta 7 temirjol vokzaly jańǵyrtylyp jatyr. Alaıda qurylysy 20% nemese 30% ǵana atqarylǵan stansalar da bar.
Aqtóbe oblysynda bıyl eskirgen temirjol vokzaldaryn jańǵyrtý jumysy bastaldy. «QTJ» UK» AQ Vokzal sharýashylyǵyn modernızatsııalaý dırektsııasy batys óńirlik fılıalynyń basshysy Dáýren Nurmaǵanbetovtyń aıtýynsha, 7 temirjol vokzalyn jóndeýge 6,7 mlrd teńge qarastyryldy. Tapsyrysty «Qazaqstan temir joly» ulttyq kompanııasy» AQ-y berdi.
- Alǵada qurylystyń 17%, Qaraýylkeldide 23%, Jem qalasynda 37% ǵana atqaryldy. Osynyń ishinde Alǵa men Qaraýylkeldidegi jumystyń toqtap turǵanyna bir aıdan asty. Merdigerdiń qarjylyq jaǵdaıy óte tómen bolyp tur. «Qurylys-montaj jumystaryna jumsaıtyn aqshasy joq. Jumys isteı almaı turmyz» dep aıtty. Jem vokzalynda da dál osyndaı jaǵdaı. Al Shubarqudyq vokzalynda shatyryn jaýyp, terezesin salyp qoıdy. Alaıda ishki jumystaryna kirise almaı otyr. Abattandyrý, perrondaǵy jumysqa kóp mólsherde qarjy kerek,- dedi «QTJ» UK» AQ Vokzal sharýashylyǵyn modernızatsııalaý dırektsııasy batys óńirlik fılıalynyń basshysy Dáýren Nurmaǵanbetov.
Qazirgi kezde Aqtóbe, Qandyaǵash, Shalqar temirjol vokzaldaryndaǵy jumystyń teń jartysynan astamy bitip tur.
- Premer-Mınıstr osy jobalardy jyl sońyna deıin tolyq aıaqtaýdy naqty tapsyrdy. Qazir jumys qarqyny baıaý. Birqatar nysanda josparlaý men uıymdastyrýda aıtarlyqtaı kemshilik bar ekeni baıqalady, – dedi oblys ákimi Ashat Shaharov.
«QTJ» UK» AQ Vokzal sharýashylyǵyn modernızatsııalaý dırektsııasy batys óńirlik fılıalynyń basshysy Dáýren Nurmaǵanbetovtyń aıtýynsha, turaqty qarjylandyryp, qujattardy der kezinde rásimdese ǵana problema sheshiledi.
Eske salsaq, Úkimet otyrysynda Kólik vıtse-mınıstri Maqsat Qalıaqparov temirjol vokzaldaryn jóndeý jumystaryn kesheýildetken óńirlerdi atady. Vokzaldardyń shamamen 70 paıyzy 30 jyldan astam ýaqyt jóndeýden ótpegen. Tehnıkalyq tekserýler nátıjesinde keıbir tireýish baǵandar men konstrýktsııalarda ári qaraı paıdalanýǵa jaramsyz aqaýlar anyqtalǵan. Osyǵan baılanysty 42 nysan tolyqtaı buzyldy. Bul óz kezeginde jumys kólemin arttyrýǵa jáne qurylys-montaj jumystarynyń bastalý merzimin keshiktirilýine yqpal etti.