Aqtóbedegi Qazaq-orys ýnıversıteti jabylady
AQTÓBE. KAZINFORM – Aqtóbedegi Qazaq-orys ýnıversıteti bıylǵy oqý jylynan soń jabylady.
Quryltaıshylardyń sheshiminen soń 2 myń stýdent qaıda barady? Ǵylym jáne joǵary bilim mınıstrligi ata-analarmen oılaın baılanysqa shyqty.
Qazaq-orys ýnıversıteti stýdentterge bıyl joǵary oqý orny jabylatynyn aıtyp, habarlama bergen. Sol habarlama negizinde búgin kóp ata-ana men stýdent oqý ornyna bardy. Alaıda bul oqý orny qandaı da bir túsinik berýden bas tartty, tipti jaýap berer basshylary da bolmady.
Kazinform tilshisi keıin №2 Aqtóbe qalalyq mektep-gımnazııasynda jıyn ótetinin bilip, jınalysqa qatysty. Munda ata-analar men stýdentter jınalyp, Ǵylym jáne joǵary bilim mınıstrliginiń ókili Artýr Edilhanov onlaın baılanysqa shyqty. Sonymen birge Aqtóbedegi jáne kórshiles oblystardaǵy JOO prorektorlary qosyldy. Al Qazaq-orys ýnıversıtetinen eshbir ókil kelmedi.
– Keıingi bir aptada, keıbir aqparat quraldarynda, áleýmettik jelide neshe túrli alypqashpa áńgime, daqpyrt sóz shaqqan. Sondyqtan óz pikirimizdi jetkizbek oıymyz bar. Jalǵan aqparattyń sońyna ermeı, memlekettik organnyń óz aýzynan estisin degen nıet... Ýnıversıtet quryltaıshysynyń bilim berý qyzmetin toqtatý týraly sheshimi bar. Ótken jyly da osyndaı sheshim qabyldap, mınıstrlikke bergen bolatyn. Ol kezde de jumysyn toqtatý týraly josparyn jazǵan. Bıyl da qaıtalandy. Buǵan deıin naýryz aıynda stýdentterge qatysty qabyldanǵan sheshim talqylanyp, ákimshilik, mınıstrlik tarapynan pikir aıtyldy. Sáýir aıynda da mınıstrlik jumys tobyn jiberdi. Bilim sapasyna zerdeleý jumysy júrgizildi. Kez kelgen joǵary oqý ornynyń qyzmeti memlekettik standartqa sáıkes kelýi tıis. Ony baqylaý mınıstrlikke júktelgen. Standart degenimiz joǵary oqý ornyna da, bilim alýshyǵa da mindet qoıylady. Eki tarap birge sapaly maman daıyndap shyǵarady, - dedi Ǵylym jáne joǵary bilim salasyndaǵy sapany qamtamasyz etý komıteti tóraǵasynyń orynbasary Artýr Edilhanov.
Onyń aıtýynsha, Qazaq-orys ýnıversıtetiniń lıtsenzııasy áli saqtaýly, sońǵy sheshim de qabyldanbady. Stýdentterdiń bári bıylǵy oqý jylyn osy ýnıversıtetten aıaqtap shyǵa alady.
– 2024-2025 jylǵy oqý jylyn aıaqtaýǵa bolady. Endigi suraq – bir oqý ornynan ekinshi oqý ornyna aýysý. Ol árbir stýdenttiń jeke quqyǵy. №595 buıryqtyń 31-tarmaǵynda «demalys kezinde bilim alýshy bir oqý ornynan ekinshisine aýysýǵa, bir bilim berý baǵdarlamasynan ekinshisine aýysýǵa quqyly» dep jazýly. «Bilim týraly» Zańnyń 42-baby boıynsha bilim berý uıymy óz qyzmetin toqtatsa, quryltaıshysy 2 aı ishinde bilim alýshylardyń basqa oqý oryna ornalasýy úshin qujattaryn berýge, buǵan deıin oqyǵan adamdardyń qujatyn memlekettik arhıvke tapsyrýǵa mindetti. Biraq buǵan qaramastan mınıstrlik óz tarapynan jumys atqarady. Kórshiles ornalasqan oblystardyń oqý oryndarymen birge jumys isteımiz. Jumys oqý jyly aıaqtalǵan soń bastalady. Mınıstrlikten arnaıy top jergilikti jerge kelip, ár stýdenttiń qujatyn jeke qaraıdy. Mınıstrlik stýdentti qabylda dep ózge oqý ornyna talap ta qoıa almaıdy. Biraq jumysty birlese atqarady, - dedi Artýr Edilhanov.
Qazaq-orys ýnıversıtetin bıyl 800-den astam stýdent bitiredi. Al 1 189 stýdent ózge oqý ornyna aýysa alady. Tek stýdent ózin qabyldaıtyn joǵary oqý ornynyń talabyn oryndaýy kerek. Onlaın kezdesýde ata-analar oqý aqysynyń aıyrmashylyǵyn bólip tóleý, ózge oqý ornyna qabyldanar kezde mamandyq ataýynyń ózegesheligin eskerý jaıyn surady. Sonymen birge memlekettik oqý oryndary UBT qorytyndysyn suraýy da múmkin. Al Qazaq-orys ýnıversıteti stýdentteriniń keıbirinde ol joq. Sebebi Reseıdiń oqý ornyna túsip, keıin aýysyp kelgeni kezdesedi arasynda. Munyń bárin Ǵylym jáne joǵary bilim mınıstrliginiń komıssııasy zerdeleıdi.
Aıta keteıik, naýryz aıynda Qazaq-orys halyqaralyq ýnıversıtetiniń 350 stýdenti oqýdan shyǵaryldy.
Ýnıversıtet rektorynyń 350 stýdentti oqýdan shyǵarý týraly buıryǵy zańsyz bolyp shyqty.