Aqtóbedegi káriz-sorǵy stansasynyń tozý kórsetkishi 70% jetip tur
AQTÓBE. KAZINFORM — Aqtóbede quny 53,5 mlrd teńge bolatyn Káriz-sorǵy stansasynyń qurylysy 2026-2027 jyldarǵa josparlanǵan. Qazirgi kezde qalany qamtyp otyrǵan jalǵyz stansanyń tozý kórsetkishi 70 paıyzǵa jetti.
Aǵyndy sýdy mehanıkalyq jáne bıologııalyq tazartýdan ótkizip, jınaıtyn káriz-sorǵy stansasy 1981 jyly iske qosylǵan. Jobalyq qýaty táýligine — 103 myń tekshe metr.
Orta eseppen táýligine 70 myń tekshe metrdi jınasa, kóp degende 96 myń tekshe metrge jetedi. Munda turmystyq jáne óndiristik qaldyq kelip túsip, tazartylady.
ıAǵnı turǵyn úılermen qatar óndiristik jáne tamaq ónerkásibi, temirjol kóligi men qurylys salasy, kólik jýý orny men janar-jaǵarmaı stansasy, monsha, saýna sekildi káriz qubyryn paıdalanatyn sharýashylyqtyń bárine bir ǵana stansa qyzmet kórsetedi.
Aǵyndy sýda tazartý kezinde reagentter qoldanylmaıdy.
— Sý aǵyspen negizgi sorǵy stansasyna túsedi. Sol jerden qalalyq káriz-tazartý qurylystaryna jetip, bıologııalyq tazartý júrgiziledi. Mehanıkalyq tazartý kezinde tor qoıylyp, qum tundyrylady jáne jınalǵan qaldyqtar alynady. Bıologııalyq tazartý kezinde aǵyndy sý aerotenkke jetip, qaıta tundyrylady. Aǵyndy sýdy tazartý kezinde maı da súziledi, — dep habarlady «Aqtobe su-energy group» AQ baspasóz qyzmeti.
Aǵyndy sý birneshe ret tazartylady, keıin rezervýarǵa toltyrylady. Jyl saıyn kóktemgi sý tasqyny kezinde belgili bir mólsheri Elek ózenine jiberiledi.
— Aqtóbe qalasynyń káriz tazartý qurylystary jumysynyń tehnologııalyq reglamentine sáıkes jyl saıyn tasqyn kezinde 10 mln tekshe metr sarqyndy sý Elek ózenine jiberiledi. Sýdy jiberý kezinde sharýashylyq maqsatta qoldanýǵa bolatyndaı etip qar sýy men ózen sýyn 1:10 esebinde aralastyryp, aǵyzady, — dep habarlady «Aqtobe su-energy group» AQ baspasóz qyzmeti.
Birneshe jyl buryn Aqtóbede káriz-sorǵy stansasyn salý jóninde másele qozǵaldy.
Ekologııa jáne tabıǵı resýrstar mınıstrligi qurylys jumystary týraly Kazinform agenttigiń suranysyna jaýap qaıyrdy.
— «Aqtóbe qalasynyń káriz tazartý qurylystarynyń qurylysy» jobasyna tehnıkalyq-ekonomıkalyq negizdeme ázirlendi. 2023 jyly salalyq saraptamadan ótti. Ekonomıkalyq saraptamanyń oń qorytyndysy alyndy. Memlekettik-jekeshelik áriptestik ortalyǵy qorytyndysy jáne RBK (Qarjy mınıstrligi) maquldaýy alyndy. Tenderlik qujattama ázirlendi. Qazirgi ýaqytta merdiger uıymdy irikteý boıynsha tender protsesi júrip jatyr, — dep habarlady Ekologııa jáne tabıǵı resýrstar mınıstrligi.
Mınıstrlik aqparatyna súıensek, qurylys 2026-2027 jyldary bastalady. Qazirgi kezde jobalyq-smetalyq quny 53,5 mlrd teńge bolyp tur.
Káriz-sorǵy stansasy jańadan salynǵanymen, eskisi de qatar jumys isteı beredi. Degenmen Aqtóbe qalasyndaǵy bul qurylys jaǵymsyz ıisti túbegeıdi joıýǵa septigin tıgize almaıdy. Sebebi ıis kózi bireý emes, birnesheý.
— Bul qurylys qaladaǵy jaǵymsyz ıis máselesin túpkilikti sheshetine kepil joq. Sebebi Aqtóbe qalasyndaǵy iri Aqtóbe jylý energııa ortalyǵy, Aqtóbe ferroqorytpa zaýyty jáne Aktóbe hrom qosyndylar zaýytynan atmosferalyq aýaǵa shyǵaryndylardy joqqa shyǵara almaımyz, — dep habarlady mınıstrlik.
Buǵan deıin habarlaǵanymyzdaı, Aqtóbe oblysynda qum toqtatý jumysy nátıje bermedi. Tórt aýdandaǵy 19 eldimekende qum kóshkini júredi. Ol — Shalqar, Yrǵyz, Temir, Baıǵanın aýdandary.