Aqtóbedegi Elek ózeninde muz jarý jumystary júrgizildi
AQTÓBE. KAZINFORM – Búgin muz jarý jumysy 5 myń sharshy metr aýmaqty qamtydy. Elek ózeniniń qala mańyndaǵy bóligi arnaıy tańdaldy.
Aqtóbe oblysynda tasqynǵa qarsy kúres jumysy áli de júrip jatyr. Qazir tótenshe jaǵdaılar qyzmeti baqylaýdy kúsheıtti.
- Sınoptıkterdiń málimetine súıensek, jerdiń tońy qazir 30-150 sm bolyp tur. Oblys aýmaǵynyń shamamen 73%-da qar jatyr. Boljam boıynsha ózenderde sý 30-naýryz ben 12-sáýir aralyǵynda kóterilýi múmkin. Sý tasqyny kezeńi qaýipsiz ótýi úshin bıyl 2-naýryzdan bastap azamattyq qorǵaýdyń kúshteri men quraldary joǵary daıyndyq rejımine aýystyryldy. Oblysta 5 500 tekshe metr sý soryldy, uzyndyǵy 123 km bolatyn aryq pen kanal tazartyldy, 640 myń tekshe metr qar shyǵaryldy. Bul jumysqa 157 adam, 93 tehnıka jumyldyryldy. Oblys aýmaǵyndaǵy Oıyl, Yrǵyz, Úlken Qobda ózenderiniń arnalarynda muz jarý jumysy júrgizildi,- dedi Aqtóbe oblystyq TJD tótenshe jaǵdaılardyń aldyn alý basqarmasynyń bastyǵy Álisher Sarbaev.
Aqtóbe qalasynda kún jylyp, sý sorý jumysy júrip jatyr. Sonymen birge aryqtar tazartyldy.
- Aqtóbe qalasy boıynsha sý tasqynyna qarsy barlyq shara qoldanyldy. 22 ýchaskede sý burý jumysy júrgizildi. Qalada 8 ózen, onyń ishinde Elek, Qarǵaly, Jaman Qarǵaly sııaqty ózenderdiń boıynda barlyq jumys atqaryldy. Ózen jaǵasy bekitilip, sýaǵar jasaldy,- dedi Aqtóbe qalasynyń ákimi Azamat Beket.
Buǵan deıin habarlaǵanymyzdaı, Aqtóbe oblysynyń Yrǵyz aýdanynda sý aıdyndaryndaǵy muz qabatyn álsiretý jumystary júrgizildi.
Tótenshe jaǵdaılar mınıstrliginiń málimetinshe, aldyn alý sharalary aıasynda seńniń keptelýin boldyrmaý jáne kóktemgi tasqyn sýlardyń kedergisiz ótýin qamtamasyz etý úshin baqylaýdaǵy jarylys jumystary uıymdastyryldy.
