Aqtóbedegi eki sý qoımasynyń tolyp ketý qaýpi seıildi
AQTÓBE. KAZINFORM – Aqtóbe oblysyndaǵy sý qoımalarynyń deńgeıi ár eki saǵat saıyn ólshenip otyr. Vıtse-premer Serik Jumanǵarın búgin tańerteń, 2024 jylǵy 7 sáýirde, Aqtóbe oblysyndaǵy Elek, Qarǵaly jáne Sazdy ózenderin jalǵaıtyn úsh sý qoımasyn áýeden baqylady.
Aqtóbe jáne Sazdy sý qoımalarynda sý aǵyzýdyń ońtaıly tranzıttik rejımin engizý arqasynda sý tolyp ketý qaýpi joq. Qarǵaly sý qoımasyndaǵy kelip jatqan sý kólemi joǵary kúıinde qalyp otyr. Munda bir apta ishinde sý tolýynyń aldyn alý úshin ony aǵyzý qolmen rettelip keledi. Jobalyq syıymdylyǵy 280 mln tekshe metr bolatyn Qarǵaly sý qoımasynyń tolý deńgeıi búginde – 270 mln m3 nemese 97%. Jasandy retteý rejıminiń nátıjesinde 350 m3/s jyldamdyqpen sý kelýi kezinde 350 m3/s jyldamdyqpen sý aǵyzý jumystary júrgizilýde. Qazgıdromettiń boljamy boıynsha, kelip túsken sý kólemi azaıa bastady.
«6 sáýirden 7-ine qaraǵan túni Qarǵaly jaǵalaýyna jaqyn ornalasqan jáne sý basý qaýpi tóngen qala shetindegi úılerdiń turǵyndaryn jappaı shuǵyl evakýatsııalaý júrgizildi, 127 adam qaýipsiz jerge kóshirildi», - dedi Serik Jumanǵarın.
Sý tasqyny saldarynan Aqtóbe oblysynda 1053 turǵyn úı (Aqtóbe qalasynda – 135, aýdandarda – 918), 46 ǵımarat pen qurylys (Aqtóbede – 9, Qobdada – 10, Oıylda – 22, Muǵaljarda – 4, Temirde – 1), 232 aýla men 689 saıajaı úıi sý astynda qaldy. 17 eldi mekenmen jol qatynasy buzyldy.
Óńirde barlyǵy 15 myń adamǵa arnalǵan 86 ýaqytsha qabyldaý pýnkti daıyndaldy. 10 myńǵa jýyq adam, onyń ishinde 4 myńnan astam bala evakýatsııalandy. 10 663 janýar qaýipsiz aımaqqa kóshirildi.
Búgingi tańda oblystyń turaqtandyrý qorynda áleýmettik mańyzy bar azyq-túlik (kartop, kókónister, kúrish, qaraqumyq jarmasy, qant, ósimdik maıy, un) mólsheri jetkilikti. Osy kólem Aqtóbe men tótenshe jaǵdaı rejımi engizilgen aýdandardy keminde 1,5 aıǵa qamtamasyz etýge jetedi.
