Aqtóbedegi dónerhanada órt shyqty
ASTANA. KAZINFORM — Aqtóbe qalasynda kópqabatty turǵyn úıdiń birinshi qabatyndaǵy dónerhanadan órt shyǵyp, 14 adam evakýatsııalandy.
Oqıǵa Almaty aýdanyndaǵy Áıteke bı kóshesinde ornalasqan úsh qabatty kóppáterli úıde bolǵan. Órt týraly habar túsken boıda oqıǵa ornyna Tótenshe jaǵdaılar mınıstrliginiń qutqarýshylary jedel jetti.
Barlaý barysynda turǵyn úıdiń birinshi qabatyndaǵy qoǵamdyq tamaqtaný nysanynyń ishinde órt shyqqany anyqtaldy. Turǵyndardyń qaýipsizdigin qamtamasyz etý úshin qutqarýshylar olardy baspaldaq arqyly shuǵyl túrde evakýatsııalaǵan.
— Qutqarýshylardyń úılesimdi áreketiniń arqasynda órt shaǵyn aýmaqta jedel sóndirildi. Tútin basqan úıden 14 adam, onyń ishinde 6 bala evakýatsııalandy, — dep habarlady Tótenshe jaǵdaılar mınıstrligi.
Órt saldarynan zardap shekkender joq. Qazirgi ýaqytta tilsiz jaýdyń shyǵý sebebi anyqtalyp jatyr.
Eske salaıyq, buǵan deıin Almaty oblysynda qoqys órtengenin habarlaǵan edik.
