Aqtóbedegi Dóń taý-ken baıytý kombınatynda úsh jumysshyny kúıik shalyp, aýrýhanaǵa tústi

AQTÓBE. KAZINFORM — «Bolashaq» shahtasynyń ken óndirý blogynda qysqa merzimdi tutaný boldy. Qazir kúıik shalǵan jumysshylar ekeýi aýdandyq aýrýhananyń jansaqtaý bóliminde jatyr.

Dóń taý-ken baıytý kombınatynyń «Bolashaq» shahtasyndaǵy ken óndirý blogynda elektr jabdyqtaryn montajdap jatqan úsh kezekshi elektroslesardy kúıik shaldy. 

— Qyzmetkerlerdiń beti men bilegin kúıik shaldy. Zardap shekkender Hromtaý qalasynyń ortalyq aýdandyq aýrýhanasyna jedel jetkizildi. Olarǵa bilikti medıtsınalyq kómek kórsetilip jatyr. Kásiporyn basshylyǵy dárigerler men qyzmetkerlerdiń týystarymen únemi baılanysta, — dep habarlady «Qazhrom» TUK» AQ kompanııasynyń baspasóz qyzmeti.

Qazirgi kezde naýqastardyń ekeýi aýdandyq aýrýhananyń jansaqtaý bóliminde jatyr. 

— 26 mamyr kúni shamamen saǵat 22:30–da «Bolashaq» shahtasynda sýtegi gazynyń shyǵýy boldy. Saldarynan úsh adam túrli dárejedegi kúıik alyp, jedel járdem brıgadasymen Hromtaý aýdandyq aýrýhanasyna jetkizildi. Eki naýqas aýyr jaǵdaıda jansaqtaý bóliminde jatyr. Úshinshi naýqas travmatologııa bólimine jatqyzyldy. Onyń jaǵdaıy ortasha aýyr dep baǵalanyp otyr. Naýqastar qajetti emdi alyp jatyr, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti. 

Eske salsaq, byltyr Aqtóbe oblysy Hromtaý aýdanynda ornalasqan Dóń ken-baıytý kombınatynda júk kóligi aýdaryldy. Oqıǵa ornynda eki jumysshy kóz jumdy.