Aqtóbedegi daýyl kezinde zardap shekken júkti áıel jansaqtaý bóliminde jatyr
AQTÓBE. KAZINFORM — Kelinshekti sanavıatsııamen oblys ortalyǵyna jetkizdi. Qazir komıssııa daýyldan keıingi shyǵyn kólemin eseptep jatyr.
Aqtóbe qalalyq kópsalaly aýrýhanasynyń travmatolog dárigeri Aıdyn Jylkeldiniń aıtýynsha, 35 jastaǵy júkti áıel emdeý ortalyǵyna jetkizilgen boıda jan-jaqty tekserýden ótti.
— Naýqas aýrýhanaǵa túskennen keıin reanımatolog, travmatolog, neırohırýrg, hırýrg, bet-jaq hırýrgi, gınekolog jáne terapevt qarady. Tekserýden soń em taǵaıyndaldy. Naýqas jansaqtaý bóliminde, dárigerler baqylaýynda. Jaǵdaıy turaqty, — dedi dáriger.
Zardap shekken qalǵan eki adam Baıǵanın aýdandyq aýrýhanasynda em qabyldap jatyr.
Al Aqtóbe oblystyq TJD basqarmasy bastyǵynyń ýaqytsha mindetin atqarýshy Qaırat Amanshınniń aıtýynsha, ekpini kúshti jel kezinde munara qulap, dúken ishinde bolǵan 6 adam qutqaryldy. Olarǵa jedel top shuǵyl jetken.
— Jedel qutqarý jasaǵynyń qutqarýshylary jáne kınologııalyq esep toby jetken soń adamdar qutqaryldy. Alty adamnyń úsheýi — bala. Qaýipsiz jerge shyǵarylyp, medıtsınalyq mekemege jetkizildi. Qazir jedel top qurylyp, aýdanda tótenshe jaǵdaı jarııalandy. Shyǵyn kólemi anyqtalady. Sınoptıkterdiń eskertýin turǵyndarǵa únemi áleýmettik jeli arqyly habarlap otyramyz, — dedi Qaırat Amanshın.
Aqtóbe oblysy ákiminiń baspasóz qyzmetiniń habarlaýynsha, qazirgi kezde Baıǵanın aýdanynda uıaly baılanys tolyq qalpyna keltirildi. Munda ekpindi jeldiń saldarynan «Qazaqtelekom» AQ teńgerimindegi bıiktigi 47 metr bolatyn metall qurastyrmaly antenna-machtalyq qurylǵysy qulaǵan bolatyn. Bul nysan 1975 jyly paıdalanýǵa berilgen.
— Qulaǵan baılanys munarasynda «Ksell» jáne «Altel» uıaly baılanys operatorlarynyń, sondaı-aq symsyz telefon jelisiniń jabdyqtary ornalasqan. Qabyldanǵan jedel sharalardyń nátıjesinde qazirgi ýaqytta «Ksell» jáne «Kar-Tel» baılanys operatorlarynyń qyzmeti tolyq qalpyna keltirilip, shtattyq rejimde jumys istep tur. Turǵyndarǵa uıaly baılanys qyzmetteri úzdiksiz kórsetilip jatyr. Baılanys munarasynyń qulaýynan keltirilgen materıaldyq shyǵyn kólemi «Qazaqtelekom» AQ-nyń ortalyq fılıaly men Baıǵanın aýdany ákimdigi birlesip júrgizetin baǵalaý jumystarynyń qorytyndysy boıynsha anyqtalady, — dep habarlady oblys ákimdigi.
Eske salaıyq, Aqtóbe oblysynda keshe, 2026 jylǵy 9 shildede keshki ýaqytta daýyl turyp, nóser jaýyn jaýyp, Qaraýylkeldi aýyly jaryqsyz, baılanyssyz qaldy. Birneshe úı men ǵımarattyń shatyry ushty.
