Aqtóbedegi daýyl kezinde 300-ge jýyq nysan búlindi

Aqtóbe oblysy Baıǵanın aýdanynyń ortalyǵy Qaraýylkeldi aýylyndaǵy daýyl men nósen jaýynnan keıingi komıssııa jumysynyń alǵashqy qorytyndysy shyqty. Nátıjesinde 298 nysannyń zaqymdanǵany anyqtaldy.

Onyń ishinde 254 turǵyn úı, 14 áleýmettik nysan, 24 kásipkerlik sýbektisi jáne alty ákimshilik ǵımarat bar.

— Baıǵanın aýdanynyń ákimi Aıbek Kópenov qazirgi ýaqytta keltirilgen shyǵynnyń naqty kólemin anyqtaý jumystary jalǵasyp jatqanyn sóz etti. «Aktobe Aýdıt Stroı» kompanııasynyń mamandary tehnıkalyq tekserý júrgizip, qorytyndy ázirlep jatyr. Saraptama jumystaryn 27 shildege deıin aıaqtaý josparlanǵan. Evakýatsııalyq pýnktke ýaqytsha ornalastyrylǵan otbasylarǵa qajetti jaǵdaılar jasalyp, jatyn oryndar men balalarǵa arnalǵan oıyn aımaqtary uıymdastyryldy. Mektep-ınternat ǵımaratynda alty otbasy ýaqytsha kóshirildi. Budan bólek, aýyldaǵy barlyq ınjenerlik ınfraqurylym qalpyna keltirildi. Gaz, sý, baılanys jáne jaryq jumys istep tur. Al qulaǵan munarany baılanys operatorynyń ókilderimen birlesip, ony qalpyna keltirý jumystary júrgizilip jatyr, — dep habarlady Aqtóbe oblysy ákiminiń baspasóz qyzmeti.

Ákimdikke ótken jıynda oblys ákimi Ashat Shaharov jumysty jylytý maýsymyna deıin aıaqtaýdy tapsyrdy.

— Barlyq qajetti sharany jedel qabyldap, zaqymdanǵan nysandar men turǵyn úılerdi qalpyna keltirý jumystaryn tıimdi uıymdastyrý qajet. Daýyl saldaryn joıý belgilengen merzimde aıaqtalýy tıis. Zardap shekken turǵyndarǵa zańnamaǵa sáıkes tolyq kólemde kómek kórsetilýi qajet, — dedi ol.

Eske salaıyq, 2026 jylǵy 10 shildede qatty daýyl turyp, baılanys munarasy dúkenge qulady.  Oqıǵa saldarynan júkti kelinshek jansaqtaý bólimine tústi.

Keıin daýylden keıingi aýyl jaı-kúıi kórsetildi. Onda sport kesheni, meshit pen jastar resýrstyq ortalyǵynyń shatyry, qabyrǵasynyń ushyp ketkenin kórýge bolady. Keıbir úıler qulap qaldy.