Aqtóbedegi áskerı qyzmetshiniń ólimine baılanysty qylmystyq is qozǵaldy

ASTANA. KAZINFORM – Aqtóbe oblysynda áskerı qyzmetshiniń sýıtsıd jasaýyna baılanysty qylmystyq is qozǵaldy.

«Osy jyldyń 23 qarashasynda Aqtóbe garnızonyna qarasty áskerı bólimderdiń birinde merzimdi qyzmettiń áskerı qyzmetshisi qaraýyl qyzmetin atqarý kezinde ózine bekitilgen qarýmen atylyp, sýıtsıd jasady. Oqıǵanyń sebebi men mán-jaıy anyqtalyp jatyr. Atalǵan fakti boıynsha qylmystyq is qozǵaldy. Tergeý múddesine oraı ózge aqparat jarııalanbaıdy. Qurlyqtaǵy ásker qolbasshylyǵy áskerı qyzmetshiniń týǵan-týystary men jaqyndaryna kóńil aıtady», — delingen Aqtóbe garnızony taratqan aqparatta.

Buǵan deıin Aqtóbe oblysyndaǵy áskerı bólimde áskerı qyzmetshi — sarbaz kóz jumǵanyn jazǵan edik.

Mundaı oqıǵalar sońǵy ýaqytta jıilep ketti. Eske salsaq, jýyrda ǵana ShQO-da merzimdi qyzmettegi áskerı qyzmetshi qaza boldy.  7 qarashada Shekara qyzmeti Shyǵys Qazaqstan oblysy boıynsha departamentiniń merzimdi qyzmettegi áskerı qyzmetshisi qaza tapty. Aldyn ala málimet boıynsha ólim sebebi — sýıtsıd.