Aqtóbedegi apat: Tikushaqqa sońǵy kúrdeli jóndeý byltyr jasalǵan
ASTANA. KAZINFORM — Qorǵanys mınıstrligi Aqtóbe oblysyndaǵy avıatsııalyq apat boıynsha taǵy da resmı habarlama jasady.
Qazaqstan Respýblıkasy Qorǵanys mınıstriniń tapsyrmasy boıynsha oqıǵa ornyna Qorǵanys mınıstriniń orynbasary — Áýe qorǵanysy kúshteriniń bas qolbasshysy avıatsııa general-leıtenanty Dáýren Qosanov basqaratyn arnaıy komıssııa keldi.
— Avıatsııalyq apattyń aldyn ala sebebi tehnıkalyq aqaýlyq dep qarastyrylýda. Alaıda túpkilikti qorytyndy tergeý is-sharalary júrgizilgennen keıin jasalatyn bolady. Zardap shekken ekıpaj músheleri qajetti medıtsınalyq kómekpen, dári-dármektermen qamtamasyz etilgen jáne mamandardyń baqylaýynda. Qaza tapqan áskerı qyzmetshiniń týystaryna materıaldyq tólemder jáne barlyq qajetti qoldaý kórsetiledi, — delingen habarlamada.
Mı-8 tikushaqtary elimiz táýelsizdik alǵannan beri Áýe qorǵanysy kúshteriniń qoldanysynda. Tehnıkanyń bul túri 50-den astam elde qoldanylady jáne óziniń kóp fýnktsıonaldyǵy men senimdiliginiń arqasynda álemdegi eń kóp suranysqa ıe tikushaqtardyń biri. Bul tikushaqqa sońǵy kúrdeli jóndeý 2023 jyly Almaty qalasynyń «405 avıatsııalyq-jóndeý zaýyty» bazasynda jasaldy. Barlyq reglamenttik jumystar, onyń ishinde ushý aldyndaǵy daıyndyq normatıvterge sáıkes oryndaldy.
Tikushaq ekıpajynyń da aıtarlyqtaı tájirıbesi bar jáne kúndiz de, túnde de qıyn meteorologııalyq jaǵdaılarda, onyń ishinde tótenshe jaǵdaılarǵa tap bolǵan kezde de tapsyrmalardy oryndaý úshin kásibı túrde daıyndalǵan.
Eske salsaq, búgin Mártók aýdany Saryjar aýylynda tikushaq apatqa ushyryp, janyp ketti.
Bortta úsh adam bolǵan. Onyń bireýi oqıǵa ornynda kóz jumdy.
Eki naýqasty kúıik shalǵan. Olar Aqtóbe oblystyq kópsalaly aýrýhanada em qabyldap jatyr. Ázirge naýqastardyń aty-jóni belgisiz.
Buǵan deıin Qorǵanys mınıstrligi resmı habarlama jasap, tikushaq apatynyń aldyn ala sebebin aıtqan bolatyn.
Sonymen qatar, tikushaq apatyna baılanysty qylmystyq is qozǵaldy. Qazir tergeý júrip jatyr.
Budan bólek, Aqtóbe oblysynyń ákimdigi tikushaq apatynan zardap shekkenderge kómek kórsetetinin málim etti.
