Aqtóbede 7 mlrd teńge aıyppul salynǵan shoshqa fermasynan nebári 151 mln teńge óndirildi
AQTÓBE. KAZINFORM — Qorshaǵan ortany qorǵaý zańnamasyn saqtamaǵan «Parıj kommýnasy XXI» JShS-niń múlki buǵattalǵan. Kásiporyn múlki satýǵa shyǵarylǵanymen, keıbiri ótpeı qaldy.
2020 jyly Aqtóbe oblysy Alǵa aýdany Bestamaq aýylynyń turǵyndary jınalyp, ferma jumysyna qarsy shyqty. Fermanyń jumysyn tekserý úshin arnaıy komıssııa quryldy.
Tekserý kezinde 13,8 gektar jerdiń topyraq qunary búlingeni anyqtaldy, ıaǵnı 5,6 gektar jer qazylyp, qatty jáne suıyq qaldyq kómilgen, qosymsha daıyndalǵan. Baıbaqty ózeniniń boıyndaǵy sharýashylyqqa arnalǵan jerge qurylys jumystary júrgizilgen.
Ekologııalyq kodeks, Ákimshilik quqyqbuzýshylyq týraly kodeks boıynsha úsh is qozǵaldy. Barlyǵy 7 mıllıard teńgeden astam shyǵyn eseptelip, aıyppul salyndy.
Atqarý óndirisi sot oryndaýshylaryna 2021 jyldyń shilde aıynda tústi.
— «Parıj kommýnasy XXI» JShS-nen memleket paıdasyna 7 027 459 824 teńge óndirý týraly is 2021 jyldyń 14-shildesinde tústi. Qazirgi tańda atqarý óndirisi oryndalýda. Óndirilgen soma — 151 459 382 teńge. Zań boıynsha aıyppul eki aıda óndirilýi kerek. Eger atqarý óndirisinde múlikti baǵalaý, satý bolsa 4 aıǵa sozylady. Atqarý óndirisi kezinde múlki satýǵa da shyǵaryldy. Onyń bir bóligi ótti, bir bóligi satylmady. Іs aýqymdy. Qazirgi jaǵdaı osy, — dedi Aqtóbe oblystyq ádilet departamentiniń aǵa sot oryndaýshysy Aqtileý Erekenov.
Onyń aıtýynsha, eldegi zań talaptary boıynsha aıyppuldy óndirý úshin múlik eki ret satýǵa shyǵarylady. Alǵashynda baǵa joǵary bolsa, keıin tómendeıdi.
— Óndirý isi keıin qaıtarylýy múmkin. Eger sot qaıta jiberse, qalǵan múlki qaıta satýǵa shyǵarylady. Ol úshin óndirip alýshy, bul jaǵdaıda memleket qaıta júginedi, — dedi Aqtileý Erekenov.
QR Aýyl sharýashylyǵy mınıstrligi de Kazinform saýalyna jaýap berdi.
— Shoshqa fermasy máselesi boıynsha osy kásiporynnyń múlki 2020-2021 jyldan beri sot sheshimi negizinde buǵattaldy. Qazirgi ýaqytta nysan men tıisti jer telimi paıdalanylmaıdy, al salynǵan aıyppul somasy tolyq kólemde óndirilmegen. Sot atqarý jumystary áli de jalǵasyp jatyr, — dep habarlady mınıstrlik.
