Aqtóbedegi 5 adam mert bolǵan jol apaty: Júrgizýshi 5 jylǵa sottaldy

AQTÓBE. KAZINFORM – Samara-Shymkent tasjolyndaǵy jol-kólik apaty kezinde rýlde bolǵan júrgizýshi — aýdandyq polıtsııa bóliminiń qyzmetkeri 5 jylǵa bas bostandyǵynan aıyryldy. Sottalýshy sol jol apaty kezinde ata-anasy men baýyrlarynan aıyryldy.

Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy sońǵy sózin aıtyp, kinásin moıyndady. Memlekettik aıyptaýshy 5 jylǵa bas bostandyǵynan aıyrýdy surady, al qorǵaýshy bul jaza ata-anasy men baýyrynan aıyrylǵan sottalýshy úshin qatań dep esepteıtinin jetkizdi.

- Qorǵaýymdaǵy Qydyrov taǵylǵan aıypty tolyq moıyndady. Іstegen is-áreketine ókinetinin aıtty. «Anamnan, ákemnen, baýyrymnan, aǵamnyń eki balasynan aıyryldym» dedi. Bári bir týǵandar. Sottan bas bostandyǵynan aıyrmaıtyn jazany suradyq, - dedi qorǵaýshy Ǵabıt Rústemov.

Sýdıa Altynbek Sabyrov bas bostandyǵynan aıyrý jazasyn taǵaıyndady.

- І. Qydyrov QR QK 345-baby 4-bóligimen kináli dep talynyp, oǵan 7 jyl merzimge kólik basqarý quqyǵynan aıyra otyryp, 5 jyl merzimge bas bostandyǵynan aıyrý jazasy taǵaıyndalsyn. Qydyrovtyń jaza óteý orny Qylmystyq atqarý júıesiniń qaýipsizdigi barynsha tómen mekemesi dep belgilensin, - dedi sýdıa Altynbek Sabyrov.

Sot úkimine Aqtóbe oblysyndaǵy aýdandyq polıtsııa bóliminiń qyzmetkerleri onlaın, qaladaǵy quqyq qorǵaýshylar offlaın qatysty. Sebebi rýlde bolǵan sottalýshy Hromtaý aýdandyq polıtsııa bóliminde jumys istegen.

Eske salsaq, tamyz aıynyń sońynda jeńil kólik pen júk kóligi soqtyǵysyp, 5 adam kóz jumdy. Oqıǵa Samara-Shymkent tasjolynyń Álııa aýyly mańynda boldy.

Jyl basynan beri Aqtóbe oblysynda 824 jol-kólik oqıǵasy boldy. Onda 121 adam kóz jumyp, myńnan asam adam jaralandy.