Aqtóbedegi 4 jolaýshynyń ólimi: taksı júrgizýshisi 5 jylǵa sottaldy
AQTÓBE. KAZINFORM – Aqtóbe-Orsk tasjolyndaǵy jol apaty kezinde 4 adam mert bolyp, taksı júrgizýshine Qylmystyq kodekstiń 345-baby 4-bóligimen aıyp taǵyldy. Sot júrgizýshini 5 jylǵa bas bostandyǵynan aıyrdy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda taksı júrgizýshisi Arstan Tajbaevqa qatysty qylmystyq is qaralyp, búgin úkim oqyldy. Aqtóbe oblysy Qarǵaly aýdanynyń týmasy taksı qyzmetin usynyp, kóligimen adam tasymaldaǵan. Bıyl maýsym aıynda aýdarylyp qalyp, tórt jolaýshy kóz jumdy.
- Qylmystyq kodekstiń 345-baby 4-bóligimen aıypty dep tanylyp, 7 jylǵa kólik basqarý quqyǵynan, 5 jylǵa bas bostandyǵynan aıyrý jazasy taǵaıyndalsyn. Jábirlenýshilerdiń azamattyq talap aryzy ishinara qanaǵattandyrylsyn. Jábirlenýshi A.Eremınanyń paıdasyna 7 mln teńge, Z. Bırmanovanyń paıdasyna 7 mln teńge moraldyq, 2 mln teńge materıaldyq shyǵyn óndirilsin, - dedi sýdıa Nurlan Baqtyǵalıev.
Sotta sottalýshy ózine taǵylǵan aıypty tolyq moıyndap, aldyndaǵy kólikpen soqtyǵysýdan jáne joldaǵy shuńqyrdan qashyp, rýldi qatty burǵanyn, sol kezde aýdarylyp qalǵanyn aıtqan.
Eske salsaq, 5 maýsym kúni Aqtóbe-Orsk tasjolynda jeńil kólik aýdaryldy. Kólikte bolǵan tórt jolaýshy kóz jumdy. Qaıǵyly oqıǵanyń aldynda taksı qyzmetiniń júrgizýshisin polıtsııa toqtatyp, jol erejesin saqtaý týraly eskertý bergeni anyqtaldy.
