Aqtóbedegi 22 eldi mekendi sý basý qaýipi bar

AQTÓBE. KAZINFORM - Sý tasqynynyń aldyn alý jumystaryna bıyl 6,5 mlrd teńge bólindi. Qazirgi kezde josparly jumystyń teń jartysyna jýyǵy ǵana oryndalyp tur.

Aqtóbede sý tasqynyna qarsy kúres jumystaryn júrgizý úshin bıyl 105 tarmaqtan turatyn joba ázirlendi. Ózen jaǵasyn bekitý, arnalardy tazartý, kanal salý jáne sý jolyn burý jumystarynyń 45% oryndaldy.

- Oblystaǵy 12 eldi mekende sý basý qaýpi tolyq joıylyp, 24-inde qaýip tómendedi. Al 22 eldi mekende sý basý qaýpi áli de saqtalady. Jospardy iske asyrýǵa 6,5 mlrd teńge qarastyrylǵan. Atqarylǵan jumystar nátıjesinde ózenderdegi jaǵalaýdyń 3 shaqyrymy nyǵaıtylyp, arnasy tazartyldy. Sonymen birge 2,3 shaqyrym qorǵanys bógeti salyndy. Uzyndyǵy 9,6 shaqyrym bolatyn gıdrotehnıkalyq qurylys jóndeldi,- dedi Aqtóbe oblystyq TJD bastyǵy Qaharman Orazalın.

Onyń aıtýynsha, 6,4 shaqyrym jerge sý burý arnasy salyndy. 26 shaqyrymǵa sozylǵan aryq pen kanaldar tazartyldy, 89 sý ótkizý nysany ornatylyp, jóndeldi.

Aqtóbe oblysy ákimi baspasóz qyzmetiniń habarlaýynsha, oblys ákimi Ashat Shaharov sý basý qaýpi bar eldi mekenderdiń tizimin, jedel toptardyń jumysyn jáne halyqpen baılanys júıesin qatań baqylaýda ustaýdy tapsyrdy.

Eske salsaq, Aqtóbede tasqynnan qıraǵan úılerdi súrýge 250 mln teńge bólindi. Tapsyrys berýshi - Almaty aýdany ákimdigi. Eki lotqa bólindi. Birinde 105 úıdi, ekinshisinde 86 úıdi súrýge kelisim jasaldy.