Aqtóbede zorlyq kórgen múgedek qyzdyń anasy kúdiktiniń qatań jazalanýyn surady
AQTÓBE. QazAqparat – Aqtóbede ІІ top múgedegin zorlaǵan kúdiktiniń isi sotqa jetip, keıin qaıta tergeýge jiberilgen, dep habarlaıdy QazAqparat tilshisi.
Múmkindigi shekteýli jannyń anasy oqıǵanyń mán-jaıyn aıtyp, qatań jaza taǵaıyndaýdy surap otyr.
«Negizi sol kúni úıge apam kelip, máre-sáre boldyq. Kóp uzamaı zorlyq kórsetken týysymyz úıge kirgen kezde qyzym kórip, «ól» dep aıqaılady. Qyzymnyń alańdaǵanyn kórgen apam kúmándana bastaǵan soń suradyq. Ol durys sóıleı almaıdy, bárin kórsetti. Qyrkúıek aıynda oqıǵa týraly bilip, úıge polıtsııa shaqyrdym. Polıtsııa kelip, kúdiktini anyqtady, Ol bir ret emes, birneshe ret zorlyq kórsetken. Týysymyz bolǵan soń senip, úıdiń kiltin tastap, qyzymyzǵa qarap qoıýyn ótinetin edik. Qazir ishimiz kúıip júr. Onyń qatań jazalanǵanyn qalaımyz. Kúdikti otbasyly, balalary da bar. Qyzymdy qorlady, keshirim bolmaıdy», - dedi ata-jónin jasyrǵan jábirlenýshiniń anasy.
Polıtsııa tergeý aıaqtalǵanyn habarlaǵanymen, sot isti keri qaıtarǵan.
«Qylmystyq kodekstiń «Zorlaý» baby boıynsha is tústi. 6-qańtardaǵy sottyń qaýlysyna sáıkes qylmystyq protsestik zańnamanyń buzylýyna baılanysty is prokýratýraǵa qaıtaryldy. Qaýly zańdy kúshine enbedi», - dedi oblystyq sottyń bas mamany Aıjamal Súndet.
Eske salsaq, «Nemolchı» qoǵamdyq qorynyń ókili Dına Tańsári áleýmettik jelidegi paraqshasynda jábirlenýshiniń týystary habarlasyp, kómek suraǵanyn jazdy. Іs sotqa jetip, qaıta tergeýge jiberilgen.
