Aqtóbede zırattyń temir qorshaýyn 32 myń teńgege satyp jibergen
AQTÓBE. QazAqparat - Aqtóbede Órleý aýyly mańyndaǵy zırattan temir qorshaýlar urlandy. Polıtsııa qyzmetkerleri qorshaýlardy urlap, satyp jibergen kúdiktini ustady, dep habarlaıdy QazAqparat tilshisi.
Aqtóbede zırattardaǵy temir qorshaýdy urlaý deregi jıilep ketti. 16 sáýir kúni polıtsııaǵa Órleý aýyly mańynda ornalasqan zıratqa jaýapty ákimshilik qyzmetkeri habarlasyp, metall qorshaýlardyń urlanǵanyn aıtty. Jedel tekserý kezinde kúdikti qolǵa tústi.
«Jedel izdestirý sharalaryn uıymdastyrý barysynda ýchaskelik polıtsııa ınspektorlary metall qabyldaý oryndaryn tekserdi jáne osy qabyldaý oryndarynan zırat qorshaýlaryn tapty. Metall qabyldaý orny qyzmetkeriniń aıtýynsha, kúdikti kólikpen kelip, qorshaýlardy tapsyrǵan. Budan ári ýchaskelik polıtsııa ınspektorlary baqylaý kameralary arqyly avtokólikti anyqtap, osy qylmysty jasaǵan kúdiktini ustady», - dep habarlady oblystyq PD baspasóz qyzmetiniń jetekshisi Erbolat Sarqulov.
Barlyǵy 30 dana qorshaý urlanǵan. Kúdikti buǵan deıin de urlyq jasap sottalǵan.
«Aqshat aýylynan shyǵyp, zırattaǵy qubyrlardy kórdim. Bul jerdiń kúzeti bar ekenin bilmedim. Qubyrdy kórgen soń alyp, satyp jiberdim. Maǵan aqsha qajet boldy. Metall qabyldaý orny 32 myń teńge berdi», - dedi kúdikti jaýap alý kezinde.
Aıta keteıik, qazir osy oqıǵaǵa baılanysty Qylmystyq kodekstiń «Urlyq» baby boıynsha tergeý-tekserý amaldary júrip jatyr. Buǵan deıin Sút zaýyty aýdany Baýyrlastar zıratyndaǵy temir qorshaýlar urlanǵan bolatyn.
