Aqtóbede zırattar jekeshelendirilip, jerleý qyzmetteri aqyly boldy

AQTÓBE. QazAqparat - Aqtóbe qalasyndaǵy zırattar resmı tirkelip, jerleý rásimin ótkizý qyzmeti aqyly bolyp ketti. Endigide, jer qazý, kirpish jetkizip, qalaý qyzmetine 100 myń teńgeden astam qarjy tóleý qajet. Turǵyndar jeke kompanııanyń usynysynan bas tartýda, dep habarlaıdy QazAqparat tilshisi.

Aqtóbe qalasy Qýraıly aýylynyń turǵyndary narazylyqtaryn bildirý úshin aýyl shetindegi beıitke birneshe kúnnen beri jıi barady. Sebebi, beıitke qazir jeke kompanııa jaýapty, olar aqyly qyzmet kórsetý úshin óz baǵalaryn bekitip qoıǵan.
 
 
 

«Biz aýyl turǵyndarynan jyl saıyn 1 myń teńgeden jınap, beıittiń kútimine jumsap turdyq. Turǵyndar aqshany óz erkimen berip, kúzetshige tólep keldi. Kúzetshi qorymdy qarap, qajet kezde tazalyq jumystaryn júrgizdi. Ári qoqys jáshigi ornatyldy. Keıin turǵyndardyń kelisiminsiz bári jekeniń qolyna ótti. Biz aqyly qyzmetke qarsymyz»,- dedi aýyl turǵyny Svetlana Gofman.

Aýyl mańyndaǵy beıit aýmaǵy - 1 gektar. Munda musylman jáne hrıstıan joralǵysymen adamdar jerlengen.

«Beıit qorshalyp, kúzetshi belgilengen edi. Barlyǵyn aýyl aqsaqaldary uıymdastyrdy. Jergilikti ákimdik kezinde qorymǵa qyzmet kórsetýden, kútim jasaýdan bas tartty. Qazir satyp alý, jalǵa alý týraly sóz shyqty. Kompanııa óz qyzmetin usynǵan kezde naqty baǵa belgilendi. Olar 20-25 myń teńgege qabir qazyp, 110 myńgege beıit salynady dep otyr. Halyqta aqsha az, sadaqa bergen kezde áleýmettik jaǵdaıy tómen adamdarǵa aýyr tıedi»,- deıdi Qýlaıly selolyq okrýgi aqsaqaldar keńesiniń tóraǵasy Baqtyǵalı Jarmuqanov.

Aýyl turǵyndary aqyly qyzmet salt-dástúrimizge qaıshy dep otyr.

Aıta keteıik, qorym jeri mamyr aıynda memlekettik satyp alýǵa shyǵarylǵan. Bul jańalyqty jergilikti turǵyndar bilmegen. Habardy estigen kezde aýyl adamdary qarsylyq kórsetip, hat jazdy. Barlyǵy 1600 turǵynnyń aryzy qazir jergilikti ákimdikke túsken.

«Qýraıly selolyq okrýginde 7 beıit bar. Onyń ekeýi - hrıstıan, beseýi musylmandar qorymy. Úsh aı buryn jer aktisi rásimdelip, tirkeldi. Aqtóbe qalasy ákimdiginiń sheshimimen memlekettik satyp alý júrip, «Biryńǵaı joralǵy ortalyǵy» JShS jeńimpaz boldy. Ol kompanııa Aqtóbedegi 50 qorymǵa qyzmet kórsetedi. Qazirgi kezde kelisimshartqa qol qoıý jumystary júrip jatyr. Olar qorshaý jasap, jerleý rásimin ótkizedi. Jer 5 jylǵa jalǵa berildi. Aýyl turǵyndary qarsylyqtaryn bildirip jatyr. Qazir jerleý rásiminiń quny qaıta qaralýda», - dedi Qýraıly aýyldyq okrýgi ákimdiginiń bas mamany Amanbek Shalabaev.

Aıta keteıik, qyzmet kórsetý aqysy bekitilgen qujatta jaz megzilinde ekskavatormen jer qazý - 25, qysta 30 myń teńge. Al qolyna kúrek alyp jer qazǵan kezde baǵa eki esege ósip, 65-70 myń teńge bolady. Al qorym salý 105-110 myń teńgeni quraıdy. Qarapaıym qujat rásimdeý, oryn belgileý 10 myńge bolmaq.