Aqtóbede zırattaǵy qulpytastardy qıratqan jasóspirimderdiń ata-analary jaýapqa tartylady

AQTÓBE. KAZINFORM — Muǵaljar aýdany Kótibar batyr aýylyndaǵy zıratta úsh oqýshy qulpytastardy qıratyp tastaǵan. Polıtsııa kámelet jasqa tolmaǵan balalardy, ata-analaryn tapty. 

Muǵaljar aýdany Kótibar batyr aýyly mańyndaǵy zıratta qulpytastar qırap jatyr. Muny sol jerge barǵan adamdar túsirip, áleýmettik jelige jarııalap jiberdi. Vıdeoden mármár tastan jasalǵan qulpytastardyń qulap, qırap jatqanyn kórýge bolady. Polıtsııa kúdiktilerdi izdep tapty.

— Ýchaskelik polıtsııa ınspektorlary kúdiktilerdi izdestirdi. Úsheýi de kámelet jasqa tolmaǵan. Olar qulpytastardy qulatyp, búldirgen. Balalaryn durys baqylamaǵan ata-analar Ákimshilik quqyqbuzýshylyq týraly kodeks aıasynda jaýapqa tartylady. Sebebi balalardyń bári 7-8 jasta. Sonymen birge búlingen qulpytastardy qalpyna keltiredi. Oblystyq polıtsııa departamenti ata-analarǵa bala tárbıesin nazardan shyǵarmaı, zań buzýdyń aldyn alýǵa shaqyrady, — dedi oblystyq PD baspasóz qyzmetiniń jetekshisi Erbolat Sarqulov.

Eske salsaq, byltyr Memleket basshysy «Qazaqstan Respýblıkasynyń keıbir zańnamalyq aktilerine adam saýdasyna, vandalızm kórinisine jáne bótenniń múlkin búldirýge qarsy is-qımyl máseleleri boıynsha ózgerister men tolyqtyrýlar engizý týraly» zańǵa qol qoıdy.