Aqtóbede jylyna 120 mıllıon dana kirpish shyǵaratyn zaýyt salynyp jatyr
Aqtóbe oblysy ákimdigine qurylys materıaldaryn óndirýshi kompanııalar jınaldy. «Nurly jer», «Nurly jol» baǵdarlamalaryn iske asyrý kezinde úzdiksiz qurylys jumystaryn júrgizgen kompanııalar aldaǵy jyly qarqyndy saqtap qalýy tıis. Ári qurylys materıaldaryn shyǵaratyn zaýyttar men tsehtar ishki suranysqa basymdyq berýi qajet. Ákimdiktegi jıyn kezinde ekijaqty memorandýmǵa qol qoıyldy.
«Ótken jyl qurylys jumystaryn júrgizý kezinde rekordtyq kórsetkishke qol jetkizdik. Saldarynan jazda kirpish tapshylyǵy sezildi. Kirpishti kórshi óńirlerden ǵana emes, Reseıden de tasýǵa týra keldi. Bıyl oblys ákimi Berdibek Saparbaevtyń tapsyrmasyna sáıkes, kirpish pen ózge qurylys materıaldarynyń barlyǵyn jergilikti taýar óndirýshilerden alýymyz qajet»,- dedi oblys ákiminiń orynbasary Serik Tólenbergenov.
Kezdesý kezinde kirpish pen Ekoton gaz bloktaryn shyǵaratyn jeti kásiporyn oblys ákimdigimen memorandýmǵa qol qoıdy. Endi olar kirpishti aldymen jergilikti qurylys kompanııalaryna satady, artylǵanyn ózge óńirge jónelte alady.
Aıta keteıik, Aqtóbede jyl saıyn 148 mıllıon dana kirpish pen 210 myń tekshe Ekoton gaz blogy shyǵarylady. Bıyl qýattylyǵy jylyna 120 mıllıon dana kirpish shyǵaratyn zaýyt iske qosylady. Aqtóbe oblysy ákiminiń baspasóz qyzmetiniń habarlaýynsha, jańa óndiris ishki qajettilikti tolyq óteýge, kirpishti kórshi óńirlerge satýǵa múmkindik beredi.
Aıta keteıik, «Nurly jer» baǵdarlamasy aıasynda ótken jyly 780 myńnan astam sharshy metr turǵyn úı salynyp, paıdalanýǵa berildi. Bıyl da osy kórsetkish saqtalady.
