Aqtóbede jylý qubyrlarynyń 40% tozdy

AQTÓBE. QazAqparat – Aqtóbe qalasynda jylý qubyrynyń 40% tozyp tur. Bıyl 4,5 shaqyrym qubyr jańartylǵan, dep habarlaıdy QazAqparat tilshisi.

Jylytý maýsymy kezine kommýnaldyq mekeme basshylary kúndiz-túni kezekshilikpen jumys isteıdi. Qazirgi kezde jylytý ortalyǵy úzdiksiz qyzmet kórsetip tur. Bıýdjettik uıymdar úshin 33 myń tonnadan astam kómir jáne 1700 tonnadan astam dızel otyny jetkizildi. Al qarapaıym halyq úshin 24 myń tonna kómir jetkilikti.

«Turǵyndarǵa arnalǵan kómir shilde aıynan bastap áli tasymaldanyp jatyr. Búginde 20400 tonna qatty otyn tasyldy. Tonnasy 17-18 myń teńge. Sonymen birge 19 vagon kómir jolda kele jatyr», - dedi oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Nurtaı Sertaev.

Aıta keteıik, Aqtóbe qalasyna «Aqtobesu-Energy Group» AQ-y qyzmet kórsetedi. Kompanııada 25 qazandyq, 263 shaqyrymǵa jýyq jylý jelisi bar. Mekeme 98 myń jeke, 2600-den astam zańdy tulǵaǵa qyzmet kórsetedi.

«Jylýmen jabdyqtaý nysany shtattyq rejımde jumys istep tur. Negizi jylý jelisiniń 40 paıyzy tozǵan. Jyl saıyn ınvestıtsııalyq baǵdarlama aıasynda aýystyrý jumysy júrgiziledi. 2025 jylǵa deıin jylý qubyryn jóndeýge 2 mlrd teńgeden astam qarjy jumsalady»,- dedi «Aqtobesu-Energy Group» AQ bas dırektorynyń birinshi orynbasary Rústem Arystanov.

Mekemede kelesi jyly tarıf kóterý suraǵy qarastyrylmaǵan.