Aqtóbede jylqylar men sıyrlarǵa jaryq shaǵylystyratyn baýlar taǵylady

AQTÓBE. QazAqparat – Aqtóbelik polıtsııa qyzmetkerleri úı janýarlarynyń kesirinen bolatyn jol-kólik oqıǵalarynyń aldyn alý maqsatynda Samara-Shymkent tas joly boıynda sharýa qojalyqtardyń basshylarymen birqatar kezdesý ótkizdi, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

Kezdesýler barysynda mal ıelerine túngi ýaqytta júrgizýshiler jolda ketip bara jatqan maldardy kórý úshin jylqylarǵa, sıyrlarǵa baılaıtyn jaryq shaǵylystyrǵysh baýlar berildi. Osylaısha polıtseıler joldaǵy apattardy azaıtýdy kózdep otyr.

«Aqtóbe oblysy PD ákimshilik polıtsııa qyzmetkerleri jol qyzmetteriniń ókilderimen birlesip, úı janýarlarynyń qatysýymen bolǵan jol-kólik oqıǵalarynyń aldyn alý maqsatynda Hromtaý aýdanynyń Samara-Shymkent avtojolyna jaqyn ornalasqan sharýa qojalyqtarynyń ıelerimen kezdesti.

Kezdesý barysynda ShQ ıelerine túngi ýaqytta maldy belgileý úshin jaryq shaǵylystyrǵysh lentalar berildi, mal jaıý boıynsha negizgi talaptar túsindirildi», - dep habarlady Aqtóbe oblystyq polıtsııa departamentiniń baspasóz hatshysy Erbolat Sarqulov.

Sondaı-aq, jol-kólik oqıǵalarynyń aldyn alý maqsatynda avtojoldyń apattyq-qaýipti ýchaskelerinde jol qozǵalysyn uıymdastyrýdyń tehnıkalyq quraldary ornatyldy.