Aqtóbede jyldar boıy kezekte turǵan áleýmettik topqa páter berildi
AQTÓBE. QazAqparat - Aqtóbede múgedek bala tárbıelep otyrǵan otbasy, jetim balalar men tolyq emes, kópbalaly otbasy músheleri páterli boldy. Jaldamaly páterge turǵyndar aı saıyn 4-5 myń teńge tóleıdi, dep habarlaıdy QazAqparat tilshisi.
Aqtóbelikter búgin qonys toıyn toılady. Uzaq jyl boıy páter kezeginde turǵandar bul baspanany aldaǵy ýaqytta satyp ala alady. Al ázirge kommýnaldyq tólemderi men páterdiń jaldaý aqysyn tóleıdi. Aqtóbe qalasy ákiminiń orynbasary Jandos Baıyrhanovtyń aıtýynsha, qazirgi ýaqytta qalada 20 myńǵa jýyq aqtóbelik kezekte tur. Olar: az qamtylǵan, tolyq emes, kópbalaly otbasy jáne múgedek balasy bar januıa. Bıýdjettik mekeme qyzmetkerleri men apatty úıdiń azamattary da kezek kútedi.
«Men balalarǵa erip, 2002 jyly Mańǵystaýdan Aqtóbe qalasyna qonys aýdardym. 2006 jyly kezekke turyp, 12 jyldan soń páterge qol jetkizip otyrmyn. Eshqaıda baryp, shaǵym aıtpadym. Sabyr saqtap, kúte bilseń, bári bolady. Ózim «Kúmis alqa» ıegerimin»,- dedi Mıýa Súıinova.
Bir kúnde Aqtóbeniń «Nur Aqtóbe» yqshamaýdanynda 9 qabatty 6 úı paıdalanýǵa berildi. Olardyń bári kezekte turǵan adamdarǵa arnalǵan. Barlyǵy 1374 páter adamdarǵa úlestirildi.
«Búgin jańadan salynǵan alty kópqabatty úı paıdalanýǵa berildi. Áleýmettik qoldaýdy qajet etetin adamdarǵa arnalǵan úı salý jumysyn jalǵastyramyz. Sońǵy 4-5 jylda mundaı úı salynbady. Bári qarjyǵa baılanysty boldy. Qazir qarjylyq jaǵdaıymyz jóndelip keledi. Jylyna kem degende 4-5 úı salsaq, biraz aqtóbelik páterli bolady»,- dedi Aqtóbe oblysynyń ákimi Berdibek Saparbaev.
Aıta keteıik, Aqtóbeniń «Batys-2» yqshamaýdanynda memlekettik baǵdarlamanyń «Báıterek Development» jelisi boıynsha 161 páter berildi. Bul páterlerdi Turǵyn úı qurylys jınaq bankine esepshot ashyp, aqsha jınaǵan adamdar ıelendi.
