Aqtóbede júıke aýrýyna shaldyqqandar atynan kólik satyp alý sharty jasalǵan
Oılaý qabileti tómen, óz áreketine jaýap bermeıtinderdiń quqyǵyn qorǵaǵan prokýratýra birneshe zańsyzdyqty anyqtady. Máselen, ótken jyldyń tamyz aıynda Shalqar aýdanynyń 35 jastaǵy turǵyny óz betimen sheshim qabyldaı almaıdy, múgedek dep tanylǵan. Biraq áli kúnge deıin oǵan qorǵanshy taǵaıyndalmaǵan. Prokýrorlardyń málimetine súıensek, ІІ múgedegi Taraz qalasyndaǵy týystarynyń úıinde turady.
«Aqtóbe qalasynyń turǵyny 2008 jyldyń qańtarynda áreketke qabiletsiz dep tanylǵan. Oǵan arada 8 jyl ótken soń ǵana qorǵanshy taǵaıyndalǵan. Qoldanystaǵy zańnamaǵa sáıkes áreketke qabiletsiz tulǵalardyń múlkine de qorǵanshylyq belgilenýi tıis. Aqyl-esi durys emes 21 adamǵa mundaı qorǵanshylyq múldem bekitilmegen. Óz is-áreketterine esep bere almaıtyn adamdar avtokólik quraldaryn satyp alý, satý týraly 10 shart jasaǵan»,- dedi oblystyq prokýratýranyń birinshi basqarma basshysy Qanat Naqymbekov.
Múgedekterge qatysty medıtsınalyq tekserýden turaqty ótý zańdylyǵy buzylǵan. Sońǵy eki jylda osy toptaǵy azamattardyń tek 15 paıyzy ǵana densaýlyǵyn teksertip, skrınıngten ótken eken.
«Psıhonevrologııalyq dıspanserde jatqan adamdardyń da quqyǵy saqtalmaǵa. Mysaly, dıspanserdiń balalar bólimshesinde bos oryndar bolsa da bes bala eresek naýqastarǵa arnalǵan bólimshege jatqyzylǵan. Olarǵa medıtsınalyq kómekti arnaıy sanaty joq dárigerler kórsetken. Prokýratýranyń aktisi boıynsha zań buzýshylyqtar joıyldy. 3 qyzmetker jaýapkershilikke tartyldy»,- dedi Qanat Naqymbekov.