Aqtóbede júıke aýrýyna shaldyqqandar qonystanǵan ortalyqtyń vıdeosy tarap ketti
AQTÓBE. KAZINFORM – Temir tor ishinde temir ydystan tamaq iship otyrǵan ortalyq turǵynynyń áreketi kópshilikti alańdatyp qoıdy. Kazinform tilshisi ortalyqtaǵy jumystyń qalaı úılestirilgenin surady.
Aqtóbe qalasy shetindegi № 2 áleýmettik qyzmet kórsetý ortalyǵy 1988 jyly ashylyp, jumys istep tur. Munda qazir 400-den astam turǵyn bar. Bári de júıke aýrýyna shaldyqqan, keıbiri múgedektigi bar adamdar. Munda 18 jastan asqan eresekter qabyldanady.
— Qazirgi tańda atalǵan mekemede 430 turǵyn bar. Barlyǵy dárigerlerdiń qorytyndysymen kelgen, júıke júıesi buzylǵan adamdar. Ortalyqta olarǵa 200-ge jýyq qyzmetker qyzmet kórsetedi. Olar aýysymmen jumys isteıdi. Áleýmettik jelige osy jer turǵynynyń atymen tirkelgen akkaýnttan vıdeo tarady. Ol turǵyn 2020 jyly osynda tústi. Jasy — 25-te. Buryn «Meıirim» jastardy áleýmettik beıimdeý ortalyǵynda tárbıelengen. Ol ózi munda jatqanyn zańsyz dep esepteıdi. Psıhologtar, psıhıatrlar jumys istedi, ıemge kelmeıdi. Kelgennen bastap osynnan qashyp ketýdi ádetke aınaldyrǵan. Jylyna bir ret qashyp ketedi. 26-naýryz kúni qashyp ketip, 27-i kúni qyzmetkerler taýyp aldy. Psıhıatrdyń joldamasymen emdeýge jiberildi. Al vıdeodaǵy turǵyn ortalyqqa 2019 jyly jatqyzylǵan. Ata-anasy bar, kelip turady. Ol áıelderdiń shashynan tartyp, er adamdardy tisteıdi. Qazir oqshaýlanǵan, - dedi № 2 áleýmettik qyzmet kórsetý ortalyǵynyń dırektory Gúlnaz Sısenova.
Onyń aıtýynsha, ortalyq turǵyndarynyń qorǵanshysy — mekeme basshysy. Ár turǵynnyń quqyǵyn qorǵaý basshynyń mindeti. Sondyqtan polıtsııaǵa shaǵym da túsirdi.
— Ortalyqtaǵy turǵyndar óz is-áreketterine jaýap bere almaıtyn bolǵandyqtan bárine men jaýaptymyn. Áleýmettik jelidegi aqparat turǵynnyń qolymen jasalǵan dúnıe emes. Sebebi onda telefon joq. Kim paıdalanyp otyr? Ony quqyq qorǵaý organdary anyqtaıdy. Shaǵym túsirdim, materıaldardy kórsettim, - dedi Gúlnaz Sısenova.
№ 2 áleýmettik qyzmet kórsetý ortalyǵynda meıirger, medbıkelermen birge terapevt, nevropatolog, psıhıatr jumys isteıdi. Naýqastar 2 jáne 3 mezgil dári-dármek, 5 mezgiz tamaq ishedi. Turǵyndardyń zeınetaqysynyń 70 paıyzy ortalyq esepshotyna túsedi, al 30 paıyzy turǵyndardyń óz shotynda turady. Eger turǵyn yryqqa kónbeı, aınalasyna qaýip tóndirse, oqshaýlanady, keıin emge jiberiledi. Em sol mańdaǵy ortalyqta júrgiziledi.
— Jalpy mekemede kamera jetkiliksiz. 10 myń sharshy metr jerde 30 shaqty kamera bar. Onyń jartysy jasap, jartysy jasamaı tur. Qazir Memlekettik satyp alý portalyna konkýrs jarııalandy, qyzmet kórsetýshi mekeme anyqtalady. Kameralar qosylyp, oryndaryn ózgertip alamyz. Myna jerde sońǵy ret 2004 jyly kúreli jóndeý jasalǵan. Káriz júıesiniń bári shirip tur. Jobalyq-smetalyq qujat daıyndalǵan soń jaryq, káriz, sýmen jabdyqtaý jumysy júrgiziledi. Ákimshilik ǵımarat salynyp jatyr. Sonymen birge jylý qazandyǵy salynady. Qysta jel soǵatyn terezelerdiń bárin qymtap, jaýyp shyqtyq bıyl. Negizi kúrdeli jóndeý kerek, - dedi ortalyq dırektory.
Aıta keteıik, ortalyqta kitaphana, qolóner bólmesi bar. Turǵyndar kitap oqyp, túrli mádenı sharaǵa qatysady. Sonymen birge toqyma toqyp, sýret te salady. Adam quqyqtary jónindegi ýákildiń ókili byltyr tómengi qabattaǵy terezedegi temir torlardy aldyryp tastady. Sonymen birge qorshaýdyń joǵary jaǵynda temir joq.
— Terrıtorııa úlken, qorshaýlar alasa. Ol da bir jaǵynan durys shyǵar. Nasqaý bolsa da olardyń quqyqtary bar, - dedi G.Sısenova.
Aıta keteıik, Aqtóbe oblystyq PD baspasóz qyzmetiniń habarlaýynsha, Áleýmettik qyzmet kórsetý ortalyǵy basshysynyń atynan shaǵym túspegen.