Aqtóbede jýrnalıst qaza bolǵan lıft aqyry aýystyrylatyn boldy
AQTÓBE. QazAqparat - Aqtóbe qalasynda eski lıftterdi aýystyrý úshin túsindirý jumystary júrgizilip jatyr. Jýrnalıst Aızat Ábdisamat qaza bolǵan lıft túbegeıli aýystyrylady, dep habarlaıdy QazAqparat tilshisi.
Aqtóbede jas kelinshek Aızat Ábdisamat qaza bolǵan lıft áli sol kúıi tur. Jýrnalıstiń anasy Aısha Tólemisova málimdeme jasap, kináli adamnyń jazalanýyn talap etken bolatyn. Budan soń «Jánibek servıs» PIK ókilderi tergeý júrip jatqanyn, eski lıft aýystyrylatynyn jetkizdi.
«Lıfttiń dál qaı kúni aýystyrylatynyn aıta almaımyn. Biz turǵyndardyń 70 paıyzy kelisim bergen qujatty ákimdikke tapsyramyz. Qaıǵyly oqıǵa bolǵan podezdiń adamdary kelisip otyr. Qujatty ákimdiktegi turǵyn úı ınspektsııasyna tapsyramyz. Jınalysqa lıft aýystyratyn kompanııa ókili de keledi. Sol kezde naqty quny, aı saıyn tóleıtin aqy bekitiledi. Bári daıyn bolsa, 1 aıdan astam ýaqytta lıft aýystyrylady. Jobamen lıfttiń quny 7,5-10 mıllıon teńge bolady», - dedi «Jánibek servıs» PIK-iniń ókili Qaısar Sabyrov.
Aıta keteıik, jýrnalıst Aızat Ábdisamat qaza bolǵan lıft eski bolǵan. Turǵyn úı 1997 jyly salynǵanymen, lıft 1990 jylǵy dep tirkelgen.
«Bul lıfttiń buryn paıdalanylǵany nemese qoımada turyp qalǵany belgisiz. Tergeý áli júrip jatyr», - dedi Qaısar Sabyrov.
Qazirgi kezde Aızat Ábdisamattyń otbasy 12 yqsham aýdandaǵy kópqabatty úıden kóship ketken. Saraptama qorytyndysy kezinde lıfttiń avtomatıkasy isten shyqqany anyqtaldy. 
