Aqtóbede júrgizýshiler tasymaldaý qyzmetin tegin atqaryp júr
AQTÓBE. KAZINFORM — Aqtóbede GAZel júrgizýshileri gýmanıtarlyq kómek ortalyqtaryndaǵy júkti tegin tasymaldap júr.
Sý tasqyny bastalǵan sátten-aq gýmanıtarlyq kómek ortalyqtary ashylyp, olarǵa aldymen óńirdegi GAZel júrgizýshileri qolushyn sozdy.
Eriktiler men gýmanıtarlyq ortalyq mamandary, júk tasymaldaý kóliginiń ıeleri ortaq chatta otyryp, bar uıymdastyrý jumystarynda belsendilik tanytty.
Habarlama túsken sátte-aq kómekke keletin olar aýdan, aýyldarǵa da bardy.
— Eriktiler jetkizilgen júkti qabyldap, suryptap, tıeýge daıyndap qoıady. Ákimdik kestesi boıynsha aýdandarǵa tikushaqpen de, GAZelmen de júk jiberdik. Búginge deıin 40-50 GAZel júk tasymaldandy. Kólik ıeleri aqsha suramady, janar-jaǵarmaı qaıda demedi. «Oıyl aýdanyna 4 GAZel kerek» dep jazamyz, ózderi keledi. Fotoǵa túsiremiz, olar aparyp tapsyrady. Sonymen birge jeńil kólik ıeleri de sondaı qyzmet atqaryp júr, — dedi Aqtóbe oblysy ákimi apparaty basshysynyń orynbasary Lázzat Orazbaeva.
Aıta keteıik, búgin Aqtóbege ánshi Dımash Qudaıbergen kelip, № 40 orta mekteptegi evakýatsııalyq pýnktke bardy. Onda turǵyndarmen kezdesti.
Sonymen birge gýmanıtarlyq kómek ortalyǵyndaǵy jumyspen tanysty. Munda eriktiler kúni-túni jumys istep júr.
