Aqtóbede júrgizýshi velosıped mingen birinshi synyp oqýshysyn qaǵyp ketti
AQTÓBE. KAZINFORM –Aqtóbede Toyota avtokóliginiń júrgizýshisi kópqabatty úıdiń aýlasynan shyǵý kezinde turǵyn aýmaqta velosıpedpen júrgen balaǵa jol bermeı, ony qaǵyp ketti. Bul týraly Polisia.kz. habarlady.
Jol kólik oqıǵasyna ushyraǵan birinshi synyp oqýshysy medıtsınalyq mekemege jetkizildi.
— Kólik júrgizýshileri aýladan shyǵý kezinde qasynan velosıpedshiniń ótetinine daıyn bolýy kerek. Velosıpedshi jaıaý júrginshige qaraǵanda jyldamyraq, óıtkeni ol shamamen 20-30 km/saǵ jyldamdyqpen qozǵalady. Ásirese irgeles turǵan úılerdiń arasy nemese arka arqyly shyǵý kezinde júrgizýshige barynsha muqııat bolý qajet. Sebebi mundaı jaǵdaılarda velosıpedshini aldyn ala baıqaý múmkindigi óte az, dálirek aıtqanda, tipti nólge teń, — dep atap ótti Aqtóbe oblysy PD jergilikti polıtsııa qyzmeti basqarmasynyń bastyǵy Aıdos Quljanov.
Esterińizge sala keteıik, qazirgi ýaqytta oblys aýmaǵynda balalardyń joldaǵy qaýipsizdigin qamtamasyz etýge baǵyttalǵan «Nazar aýdaryńyz, balalar» aktsııasy ótip jatyr. Shara aıasynda polıtsııa qyzmetkerleri oqýshylarmen profılaktıkalyq kezdesýler ótkizip, joldardaǵy qaýipsiz minez-qulyq týraly áńgimeleıdi.
