Aqtóbede jumysyna salǵyrt qarady dep aıyptalǵan basshylar sot zalynda aqtalyp shyqty

Aqtóbe oblystyq tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamentiniń basshysy Gúlnur Masına men onyń orynbasary Nurlan Bolatbaevqa alǵashynda Qylmystyq kodekstiń «Laýazymdyq ókilettilikterdi teris paıdalaný» baby boıynsha aıyp taǵylyp, tergeý júrdi. Keıin prokýror «Salǵyrttyq» babymen qaıta qarap, aıyptaý qorytyndysyn daıyndady.

Іs materıalyna súıensek, «Aqtóbe jylý elektr ortalyǵy» AQ tarıfti bekitý úshin 2017-2022 jyldarǵa arnalǵan ınvestıtsııalyq baǵdarlama ázirlegen. Qujat tapsyrý kezinde ınvestıtsııalyq baǵdarlamany iske asyrý úshin bankten nesıe alynatyny kórsetilgen. Sol kezde oblystyq tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamenti tarıfti bekitýge kelisim beredi. Biraq prokýrorlar tekserýinen keıin «Aqtóbe jylý elektr ortalyǵy» AQ bankten nesıe almaǵany, tarıfti bekitý kezinde júktelgen mindetter oryndalmaǵany anyqtaldy. «Aqtóbe jylý elektr ortalyǵy» AQ tarıf kótergen kezde jylý taratýshy «Transenergo» AQ-nyń da qyzmeti qymbattady.

Búgin №2 Aqtóbe qalalyq sotynda úkim oqyldy. «Gúlnur Masına, Nurlan Bolatbaev Qylmystyq kodekstiń «Salǵyrttyq» baby boıynsha aqtalsyn», - dedi sýdıa Seıfolla Tasymbetov.

Sýdıanyń aıtýynsha, memlekettik qyzmetkerler ózine júktelgen mindetti tolyq oryndaǵan, tarıfti bekitý kezinde bankpen jylý berýshi mekemesi arasyndaǵy kelisimshartty kórsetý, tirkeý mindetti qujatqa jatpaıdy.

«Moraldyq shyǵyn óndirý týraly oılanǵan joqpyn. Jumysty ári qaraı jalǵastyra beremin. Negizi qarapaıym turǵyndar úshin tarıf qymbattaǵan joq. Qyrkúıekte kezekti eńbek demalysy da kelip tur. Úsh dıplomym bar, meniń qatelik jiberýim múmkin emes edi. Ózim Bolashaq baǵdarlamasynyń túlegimin», - dedi Gúlnur Masına.