Aqtóbede jumyssyzdar qysqa merzimdi kýrstarda tegin oqytylady
AQTÓBE. QazAqparat - Aqtóbede jumyssyzdar qysqa merzimdi kýrstarda tegin bilim alady. Bıyl 570 adamdy oqytýǵa bıýdjetten 103 mıllıon teńge bólindi, dep habarlaıdy QazAqparat tilshisi.
Aqtóbe qalasyndaǵy Keńes Nokın aýylynyń turǵyndary men jumyssyz júrgen kez kelgen adam Aýyl sharýashylyǵy kolledjiniń materıaldyq-tehnıkalyq bazasymen tanysýǵa múmkindik aldy. Munda bıyl qoıan, qus ósirip, et óńdeý mamandyqtary boıynsha qysqa merzimdi kýrstar ashylady. Sonymen qatar, aspaz, daıashy mamandyqtary da bar. Elektrıkter men kólik jóndeýshilerge de basymdyq berilgen. Bul kýrstar «Nátıjeli jumyspen qamtý jáne jappaı kásipkerlikti damytý» baǵdarlamasy boıynsha tegin iske asyrylady. Ári aı saıyn 16 700 teńge shákirtaqy beriledi.
«Bir utymdysy, aýyl sharýashylyǵy baǵytynda bilim alǵan jumyssyzdar men jastar aldaǵy ýaqytta kásippen aınalysa alady. Barlyǵy 35 adamǵa 105 mıllıon teńge kóleminde shaǵyn nesıe berilmek. Qalalyq jumyspen qamtý jáne áleýmettik baǵdarlamalar bólimi arqyly jastar tájirıbesine 1600 adam jiberiledi. Bul maqsatqa 512 mıllıon teńge bólingen. Al áleýmettik jumys oryndaryna 120 adam baǵyttalmaq. Bıyl qysqa merzimdi kýrstarda barlyǵy 570 adam tegin oqıdy. Kýrstar qaladaǵy tańdaýly kolledjderde ashylady»,- dedi qalalyq jumyspen qamtý jáne áleýmettik baǵdarlamalar bóliminiń basshysy Neılá Bórtebaeva.
«Gúldene ber, týǵan el» aktsııasy aıasynda 950 adamdy qamtý úshin 62 mıllıon teńgege jýyq qarjy bólindi. «Kásipkerler negizi» kýrsynda 30 adam oqı alady.
