Aqtóbede jumysshylardyń ekologııalyq tólemin qysqartqan munaı kompanııasy sotta jeńildi
AQTÓBE. QazAqparat - Aqtóbegi eń iri munaı kompanııasy jumysshylaryna ekologııalyq ústemeaqy tóleýdi toqtatty. Buǵan kelispegen úsh jumysshy sotqa aryz berip, jeńip shyqty, dep habarlaıdy QazAqparat tilshisi.
Aqtóbe qalalyq sotynda «SNPS-Aqtóbemunaıgaz» AQ-nyń úsh jumysshysynyń aryzy qaralyp, olar jeńiske jetken bolatyn. Al búgin azamattyq is apellıatsııalyq satyda qaıta qaraldy.
Іs materıalyna súıensek, Aqtóbe jerine kelgen qytaılyq ınvestorlar 20 jyldan beri jumysshylarǵa turǵylyqty jerine baılanysty ekologııalyq ústemeaqy tólep keldi. Al 2017 jyldan bastap «SNPS-Aqtóbemunaıgaz» AQ basshylyǵynyń buıryǵymen ekologııalyq tólemder toqtatylyp, esesine 2380 qyzmetkerdiń jumys istep júrgen jerine qaraı qosymsha aqy jáne jeńildikter engizildi. Bul Aral mańynda turatyn Aqtóbe oblysy Shalqar aýdany turǵyndarynyń kóńilinen shyqpady. Sebebi olar jalaqyǵa 50 paıyz ústemeaqy jáne jylsaıynǵy eńbek demalysyna qosymsha 12 kún alyp kelgen bolatyn. Budan keıin jumysshylar sotqa aryz túsirgen. Aqtóbe qalalyq azamattyq soty talapker Serikbaı Amanturulynyń, Muhıdýlla Shúıinshalın men Murat Tóleýbaevtyń aryzyn qanaǵattandyryp, ekologııalyq tólemdi tolyq qaıtarýǵa sheshim shyǵardy. Búgin is apellıatsııalyq satyda qaraldy.
«Munaı kompanııasy sot sheshimin ózgertýdi suraıdy. Sebebi, osy isten keıin áleýmettik arazdyq týyp, barlyǵy jappaı sotqa júginýi múmkin. Sonymen qatar, munaı kompanııasy 2380 jumysshyǵa tólep otyrǵan qosymsha aqyny alyp tastaýǵa, buryn tólegen qarjyny sot arqyly keri qaıtarýǵa májbúr bolady»,- dedi munaı kompanııasynyń ókili Janna Lejvınskaıa.
Al talapkerlerdiń advokaty alǵashqy sot sheshimin ózgerissiz qaldyrýdy surady. Sebebi, ózi qorǵap otyrǵan úsh jumysshy ómir boıy Aral mańy ekologııalyq aımaǵymen teńestirilgen Shalqar aýdanynda turady.
«Munaıshylar «Aral óńirindegi ekologııalyq qasiret saldarynan zardap shekken azamattardy áleýmettik qorǵaý týraly» Zańyna sáıkes ústemeaqy alyp keldi. Biraq arada 20 jyldan astam ýaqyt ótkennen keıin munaı kompanııasy burynǵy tólemderdi zańsyz dep sheship, barlyǵyna ortaq óz erejesin usyndy. Nátıjesinde ekologııalyq aımaqta turatyn jumysshylardyń quqyqtary buzyldy. Olardyń densaýlyǵy týraly aıtpasa da túsinikti»,- dedi qorǵaýshy Seýl Hon.
Aıta keteıik, apellıatsııalyq satyda alǵashqy sot sheshimi ózgerissiz qaldy. Munaıshylar óz shaǵymdarynyń durys ekenin dáleldep, jeńiske jetti. Al munaı kompanııasy kassatsııalyq shaǵym túsiretinin málimdedi.
