Aqtóbede jumysshylar kórsetken qyzmeti úshin aqshany kimnen suraryn bilmeı júr
AQTÓBE. QazAqparat – «Jańatas Aqtóbe» JShS-i óndirgen qıyrshyqtasty tasymaldaǵan jumysshylar eńbekaqysyn daýlap oblys ákimdigine bardy, dep habarlaıdy QazAqparat tilshisi.
Aqtóbe oblysy, Shalqar aýdany, Bershúgir aýylyndaǵy óndiris ornynda qıyrshyq tas shyǵarǵan «Jańatas Aqtóbe» JShS-niń jumysshylary jalaqysyn daýlap, birneshe ret ákimdikke bardy.
Oblys ákimdigi «Jańatas Aqtóbe» kompanııasynyń jer qoınaýyn paıdalaný quqyǵy «Temir Tas» JShS-ne berilgenin, jumysshylar aldyndaǵy qaryz 21-qyrkúıekke deıin óteletinin habarlady.
Biraq qaryz túgel ótelmeıtin sııaqty. Sebebi berejaq 12 mıllıard teńgege jetken.
«Zań boıynsha eń aldymen biz jalaqyny tóleýimiz qajet. Al búgin ákimdikke kelgen adamdar zaýytqa qyzmet kórsetken, qıyrshyq tas tasymaldaǵan kásipkerler. Kásiporynǵa birneshe múmkindik berilgenimen tyǵyryqtan shyǵa almady. Bir ǵana bank aldyndaǵy qaryzy 7 mıllıard teńgege jetken. Jalpy 12 mıllıard teńge qaryz», - dedi oblys ákiminiń orynbasary Qaırat Bekenov.
Jumysshylar sotqa aryz berip, sot sheshimi kásipkerlerdiń paıdasyna sheshildi. Qyzmet kórsetýshiler qujattarymen «Jańatas Aqtóbe» kompanııasyna barǵanymen bankrot bolýdyń aldynda turǵandyqtan zaýyt aqsha joq dep keri qaıtarǵan. Eki ortada qalǵan tasymaldaýshylar endi sot oryndaýshylaryna úmit artady.
«Jańatas Aqtóbe» kompanııasynda ońtaılandyrý júrip jatyr. Qazirgi kezde sot oryndaýshylary kompanııanyń Bershúgir stansasyndaǵy temirjol jolaǵyna, zaýyttyń karerine tyıym saldy. Ońtaılandyrý isi aıaqtalǵan soń múlki baǵalanyp, túsken aqsha jalaqyǵa, qyzmet kórsetý aqysyna beriledi», - dedi oblystyq ádilet departamenti basshysynyń orynbasary Azamat Berdibekov.
Barlyǵy onǵa jýyq tasymaldaýshy 1-11 mıllıon teńge aralyǵynda aqsha alýy tıis. «Jańatas Aqtóbe» kompanııasy keńsesin jaýyp tastasa, «Temir Tas» JShS-i bul suraqtyń ózderine qatysy joq ekenin eskertken.
«2019 jyldyń maýsym aıynda jer qoınaýyn paıdalaný quqyǵy bizge aýysty. Kelisimshartta jumysshylardyń jalaqysy men salyqty tóleý mindetteldi. Biz 12 mıllıard teńge qaryzdy qabyldaǵan joqpyz. Qazir óz mindetimizge alǵan aqshany tólep jatyrmyz. Qyrkúıek aıynyń sońyna deıin 10 mıllıon teńgege jýyq aqshany aýdaramyz. Bizge jalaqysyn surap 89 adam ǵana habarlasty», - dedi «Temir Tas» JShS-niń atqarýshy dırektory Aleksando Tsoı.
Aıta keteıik, Aqtóbe oblysy boıynsha 13 kompanııa jumysshylaryna 213 mıllıon teńge qaryz. ıAǵnı, 370 adam eńbekaqysyn ýaqytyly almaǵan. Ásirese bankrot bolatyn bes kompanııanyń qaryzy 89 mıllıon teńge. Berejaq kompanııalar arasynda Aqtóbe metall qubyrlar zaýyty, qoqys jınaýmen aınalysqan «Taza qala» kompanııasyn men shaǵyn munaı óńdeý zaýyty bar.
