Aqtóbede jumyspen qamtý ortalyǵy balabaqsha ǵımaratyn «tonap» ketken
AQTÓBE. QazAqparat - Aqtóbelik kásipker Ásemgúl Balqybaeva memlekettik satyp alýǵa qatysyp, 195 orynǵa arnalǵan balabaqsha ǵımaratyn jóndep, iske qosýǵa kelisim berdi. Biraq eski ǵımaratta otyrǵan qalalyq jumyspen qamtý jáne áleýmettik baǵdarlamalar bólimi kóshken kezde esigi men tósenishin, jylý batareıalaryn túgel alyp ketken, dep habarlaıdy QazAqparat tilshisi.
Aqtóbe qalasynda buryn balabaqsha ǵımaraty bolǵan nysandardy qaıtarý jumysy júrip jatyr. Bul joly qalalyq jumyspen qamtý jáne áleýmettik baǵdarlamalar bólimi qonystanǵan eki qabatty ǵımarat memlekettik satýǵa shyǵaryldy. Konkýrs kezinde kásipker Ásemgúl Balqybaeva jeńimpaz bolyp, qalalyq ákimdik pen kásipker kelisim shartqa qol qoıdy. Kásipker ǵımaratty jóndep, sanıtarlyq erejeler boıynsha bir aıdan soń baqshany iske qosýy tıis bolatyn. Biraq eki qabatty ǵımaratta qazir jylý batareıalary, esikteri men edenge jaıylǵan lınoleým joq, elektr toǵy zaqymdanǵan. Kásipker barlyq shyǵyndy 5 mıllıon teńgege eseptep, ishki ister organdaryna aryz túsirdi.
«Aqtóbe qalasynda birneshe balabaqsha jumys istep tur. Bul salany jaqsy meńgergen soń balabaqsha aýmaǵyn keńeıtip, jańa is bastaýdy jón kórdim. Bássaýdaǵa qatysyp, 195 orynǵa arnalǵan balabaqsha ǵımaratyn ıelenip otyrmyn. Bizdiń mindetimiz ǵımaratty jóndep, jıhazben qamtamasyz etý, balabaqshany memlekettik-jeke menshik seriktestik aıasynda iske qosý. Jóndeýge arnalǵan qarjyny ózimiz shyǵaramyz. Jóndeý jumystary úshin «Damý» qorynan 10 mıllıon teńge nesıe alýy úshin ótinish jazǵan edim. Qazirgi shyǵynym asyp ketip otyr. Nesıe alatyn kezde men qalalyq jumyspen qamtý jáne áleýmettik baǵdarlamalar bóliminiń qyzmetkerleri batareıalardy alyp ketetinin bilmedim. 7 tamyz kúni ortalyqqa kelip, ǵımaratty bosatýdy suradym. Qalalyq jumyspen qamtý jáne áleýmettik baǵdarlamalar bóliminiń basshysy Neılá Bórtebaeva demalysta júrgenin, kóshýge ýaqyt berýin surady. Biz kelmedik. Olar eń sońǵy zatyn 22 tamyz kúni shyǵaryp, kiltti dalada júrgen jumysshyma berip ketken», - dedi kásipker Ásemgúl Balqybaeva.
Kásipker ǵımarat bosady degen habardy estigen soń ishki jumystarǵa jaýapty qyzmetkerin jiberip, qajetti zattardyń tizimin jasaýdy suraıdy. Jylý júıesin tekserýge kelgen qyzmetker birde-bir batareıa qalmaǵanyn, edenge tóselgen lınoleýmniń, elektr toǵynyń buzylǵanyn kórgen. Endi kásipker barlyq batareıalardy qaıta ornatyp, jumysshynyń aqysyn tóleýdi talap etip otyr. Mán-jaıdy bilip otyrǵan qalalyq jumyspen qamtý jáne áleýmettik baǵdarlamalar bóliminiń basshysy Neılá Bórtebaeva tergeý jumystary aıaqtalmaı naqty aqparat bere almaıtynyn málimdedi.
«Qazir tergeý júrip jatyr. Tergeý jumysy aıaqtalǵanǵa deıin eshteńe aıta almaımyn. Ol urlanǵan zattar meniń úıimde tabyldy dep jazǵan. Bul-jalǵan»,- dedi ol.
Aqtóbe qalalyq ákimdigi osy oqıǵaǵa baılanysty komıssııa quryp, tekserý jumysyn bastady.
«Kásipkerdiń aryzyna baılanysty qalalyq ákimdikte tekserý komıssııasy quryldy. Osy is boıynsha Sazdy polıtsııa bólimi tergeý jumystaryn bastady», - dedi qala ákiminiń baspasóz hatshysy Larısa Tomchýk. Qalalyq ákimdikte qurylǵan komıssııany ákimniń orynbasary Rýzııa Aıdasheva basqarady. Sonymen qatar, zańgerler men qarjygerler de bar.
Aıta keteıik, ǵımarattaǵy múliktiń joǵalýyna baılanysty Qylmystyq kodektiń «Urlyq» baby boıynsha is qozǵaldy.
