Aqtóbede jumys taba almaǵan aýyl turǵyny qoıan asyrady
AQTÓBE. QazAqparat - Mamandyǵy boıynsha jumys taba almaǵan Aqtóbe oblysy, Shalqar aýdanynyń turǵyny Janerke Bekmyrzaeva kásipker boldy. Ol qazir qoıan baǵady, dep habarlaıdy QazAqparat tilshisi.
Aqtóbe oblysynyń turǵyny Janerke Bekmyrzaeva joǵary oqý ornynda bilim alyp, dıplommen aýylǵa barady. Biraq týǵan jerinde turaqty jumys taba almaı, jastar tájirıbesimen Shalqar aýdanyndaǵy mektepte hatshy qyzdyń qyzmetin atqarady. Jumysyna kóńili tolmaǵan jas maman «Bastaý» baǵdarlamasymen kásipkerliktiń qyr-syryn meńgerýge sheshim qabyldap, qoıan ósirýge arnalǵan bıznes jospar daıyndaıdy.
«Kishkentaı kezimde ákem qoıan baqty. Sondyqtan osy baǵytty qolǵa alýǵa sheshim qabyldadym. «Aılın» jeke kásipkerligin tirketip, bıznesti bastaýǵa 400 myń teńge saldym. Alǵashynda ákem men inim qoıanǵa qajetti tordy jasap berdi. Úıdiń mańynda qora bar. Reseıden 15 qoıan satyp aldym. Qoıan tez kóbeıip keledi. Eti men terisine suranys bar»,- dedi kásipker Janerke Bekmyrzaeva. Qazirgi kúni qoıannyń sany 50-ge jetti. Kásipker aldaǵy ýaqytta 2 mıllıon teńge nesıe alyp, tor jasap, arnaıy ǵımarat salýdy josparlap otyr.
«Qoıannyń eti paıdaly, dıetalyq ónim. Keıin terisin ılep, ton, sómke tigýge bolady. Osy baǵytty jandandyryp, sharýashylyqty keńeıtýdi maqsat etip otyrmyn»,- dedi ol.
Qazirgi kezde jas kásipkerdiń ıdeıasyn iske asyrýǵa Ulttyq kásipkerlik palatasynyń Shalqar aýdandyq fılıaly kómektestip jatyr.
«Aldaǵy ýaqytta is alǵa basyp, sharýashylyq aýqymy keńeıse, qoıan atýǵa ruqsat berip, týrısterdi shaqyrýǵa múmkindik bolady. Bul kásipkerdiń bıznes josparynda bar»,- dedi «Bastaý» jobasynyń bıznes keńesshisi Baqytjan Anapın.
Ótken jyly Aqtóbe oblysy, Shalqar aýdanynda 263 adam kásipkerlikti meńgerip, 58 túlek isin bastady. Olar 143 mıllıon teńge nesıe aldy.
