Aqtóbede jumyssyz júrgen azamat turǵynnyń atyna 4 onlaın nesıe rásimdegen
Aqtóbede jumyssyz júrgen azamat turǵyndy jumysqa ornalastyramyn dep sendirip, atyna 4 birdeı onlaın nesıe rásimdegen, dep habarlaıdy QazAqparat Polisia.kz-ke silteme jasap.
Mamyr aıynyń sońynda Alǵa qalasynyń 19 jastaǵy turǵyny ózine jumys izdegen. Jumys izdep júrgen jas jigitti Muǵaljar aýdanynyń 23 jastaǵy turǵyny aksessýarlar satatyn onlaın dúkenge jumysqa ornalastyratynyn aıtyp sendirgen.
Jumysqa ornalastyrýǵa qujattaryn rásimdeıtinin aıtqan muǵaljarlyq jigit onyń jeke kýáligin alyp, onlaın-dúkenmen jumysty kórsetemin degen syltaýmen telefonyn da qoldanǵan. Sodan onyń atyna úsh bank pen bir qarjy uıymynan 4 onlaın nesıe rásimdegen.
Nesıeniń jalpy somasy 2 mıllıon tengege jýyqtady. Bul týraly jábirlenýshi bankterden óziniń atyna nesıeni ýaqytyly tólemegeni týraly habarlandyrýlar kelgen kezde bilip, qazan aıynda polıtsııaǵa aryzdandy.
Alǵa aýdany polıtsııa bóliminiń qyzmetkerleri jedel-izdestirý sharalaryn júrgizý barysynda kúdiktini ustap, polıtsııa bólimine jetkizdi. Jigit óz kinásin moıyndap, aqshany jeke qajettilikterine jumsaǵanyn aıtty.
Bul rette, jigittiń ózi jumyssyz ekeni anyqtaldy. Bul fakti boıynsha Qazaqstan Respýblıkasy Qylmystyq kodeksiniń 190-babynyń 1-bóligi (Alaıaqtyq) boıynsha qylmystyq is qozǵaldy. Tergeý júrgizilip jatyr.
