Aqtóbede jumysqa shyqqan bir top aýyl turǵyny qar qursaýynda qaldy
AQTÓBE. KAZINFORM – Aqtóbede Muǵaljar aýdany Qumsaı aýylynyń turǵyndary tańnan beri qar qursaýynda tur. Vahtalyq ádispen jumys isteıtin turǵyndar jyl saıyn osy kúıge túsip, qıyndyq kóretinin aıtty.
Muǵaljar aýdany Qumsaı aýylynyń turǵyndary aýdan ortalyǵyna 210 shaqyrym jol júrip barýy tıis. Al týra jol 110 shaqyrymdy quraıdy. Qysta aınalma joldy paıdalanatyn olar qazir orta tusynda qalyp, kómek kútip otyr.
- Qumsaı aýylynan Embi qalasyna deıin - 90 shaqyrym. Biz qazir sol qalaǵa jete almaı, jolda turmyz. Qar arshýy tıis merdiger kompanııany múlde kórmedik, joldy birde bir ret tazartpady. Birneshe jyldan beri aýyl adamdary óz kúshimen júr. Aýdan ortalyǵy Qandyaǵash qalasyna barar jolda da qatynas joq. Ol - 110 shaqyrym. Ortalyqqa Embi qalasy arqyly barsań 210 shaqyrym jol júresiń. Qazir jumysymyzǵa jete almaı, kólik ishinde otyrmyz. Aýyldan 15 shaqyrym jerde turmyz. Barlyǵy - tórt kólik. Bári de vahtalyq ádispen jumys isteıtin adamdar, stýdentter. Tańǵy saǵat 7:30-da shyqtyq. Merdiger qashan jol tazalaıdy dep úıde jatamyz ba? Jumysqa barýymyz kerek, sondyqtan jolǵa shyqtyq. Janymyzǵa sharýa qojalyǵynyń traktory keldi. Onyń jol tazalaýǵa qatysy bolmasa da, sonyń sońynan eremiz dep úmittinemin, - dedi Qumsaı aýylynyń turǵyny Eset Ospanov.
Muǵalǵar aýdandyq ákimdigi búginge deıin joldy qar baspaǵanyn aıtty. 1 aqpanda borap, qatynas qıyndaǵan. Aýa raıynyń ózgeristeri týraly habarlama berilgenimen, turǵyndar jolǵa shyǵyp ketken.
- Kólikti shyǵaryp jiberý úshin tehnıka jiberildi. Qazir boran soǵyp tur, joldy tazartqanmen birden basyp qalady. Qar tazalaıtyn merdiger búgin anyqtalyp jatyr, - dedi Muǵalǵar aýdanynyń ákimi Darhan Ermaǵambetov.
