Aqtóbede júkti bolǵan áıel kóz jumdy
AQTÓBE. QazAqparat -Aqtóbede 26 jastaǵy Inna Pılıch kóz jumdy. Eki apta boıy jansaqtaý bóliminde jatqan naýqastyń ólimi tekserilip jatyr, dep habarlaıdy QazAqparat tilshisi.
Eki balanyń anasy Inna Pılıch úshinshi júktiligi kezinde qatty naýqastanyp, jedel járdem shaqyrdy. Aldymen 5 jeltoqsan kúni basy aýyryp, júregi aınyp, qusyp júrgen naýqasqa jedel járdem dárigerleri emhanaǵa barýǵa keńes beredi.
«8 jeltoqsan kúni basy aýyryp, qusqan soń jedel járdemdi taǵy shaqyrdyq. Júktiligi 5-7 apta boldy. Ekinshi shaqyrýda jaǵdaıy nasharlaı bergen soń aýrýhanaǵa jatqyzyp, gınekologııa bóliminde em qabyldady. Aýrýhanada da eshteńe kómektespegen soń júktilikti toqtatýǵa sheshim qabyldadyq. 12 jeltoqsan kúni ota jasaldy. Aıaǵynan áreń turatyn adamdy aýrýhanadan shyǵarýǵa kelisim berdi. Sharasyzdyqtan biz 13 jeltoqsanda oblystyq densaýlyq saqtaý basqarmasyna baryp, ózimizdiń jaǵdaı týraly aıttyq. Úıge kelgen kezde basqarmadan telefon shalyp, qaıta aýyrýhanaǵa jatyńyzdar dedi. Kelesi kúni aýyrýhanaǵa jattyq», - dedi kóz jumǵan Irınanyń ápkesi Tatıana Pılıch.
Naýqastyń jaǵdaıy 18 jeltoqsan kúni kúrt nasharlap, esinen aıyryldy. Jansaqtaý bólimine túsken soń túrli analız jasalyp, tekserý bastaldy. Alǵashynda naýqasqa Malformatsıa Arnolda - Kıarı dıaznozy qoıylyp, em qabyldady, al qaıtys bolǵan soń menıngoentsefalıt dep jazyldy.
«Sińlimniń menıngoentsefalıtke shaldyqqanyn máıithanada aıtty. Bári dárigerlerdiń salǵyrttyǵynan dep bilemin. Oblystyq prokýratýra, densaýlyq saqtaý basqarmasyna shaǵym túsirdik», - dedi Tatıana Pılıch.
Qazir kelinshektiń ólimine baılanysty oblystyq qoǵamdyq densaýlyq saqtaý basqarmasy tekserý júrgizip jatyr.
«Naýqas gınekologııa bóliminde em qabyldady. Júktilik kezinde sozylmady aýrýlar qozyp, kúsheıetini belgili. Qazir eshteńe aıta almaımyz. Gıstologııa nátıjesinen soń naqty sebebi anyqtalady. Aýrýhanada oǵan em jan-jaqty júrgizildi», - dedi Aqtóbe oblystyq medıtsına ortalyǵynyń bólim basshysy Zamza Haırýllına.
