705 mln teńge shyǵyn: Aqtóbede júk kólikterin zańsyz tirkegen qylmystyq toptyń isi sotqa joldandy
ASTANA. KAZINFORM — QMA Aqtóbe oblysy boıynsha departamenti prokýratýranyń úılestirýimen mindetti tólemderden jaltarý maqsatynda júk avtokólikterdi zańsyz esepke qoıýmen aınalysqan qylmystyq topqa qatysty tergep-tekserýdi aıaqtady. Bul týraly QMA málim etti.
Tergeý amaldaryna saı, top músheleri Aqtóbe, Atyraý jáne Batys Qazaqstan oblystary aýmaǵynda N3 sanatyndaǵy (júk tartqyshtar) jáne M1 sanatyndaǵy (jeńil avtokólikter) 82 kólikti zańsyz tirkegen. Quramynda 9 adam bolǵan, olardyń arasynda avtoınspektor men notarıýs ta bar.
— Klıentter messendjerler men ınternet-resýrstar arqyly tabylyp, mindetti tólemdersiz júk avtokólikti tirkeý qyzmetteri usynylǵan. Kelisim jasalǵannan keıin uıymdastyrýshy kólik týraly málimetterdi ishki ister organdarynyń qyzmetkerine berip, uqsas tehnıkalyq sıpattamalary bar, buryn esepten shyǵarylǵan avtokólikterdi iriktetken. Odan ári top músheleri jalǵan satyp alý-satý sharttary men senimhattar rásimdep, jalǵan tulǵalardy tartyp, qujattardy arnaıy HQKO arqyly ótkizip, zańsyz tirkeýdi júzege asyrǵan, — delingen habarlamada.
Bul rette notarıýstyq áreketter zańdy ıelerdiń naqty qatysýynsyz júrgizilgen. Memleketke keltirilgen jalpy zalal 705 mln teńgeni qurady. Sot sanktsııasymen kúdiktilerdiń 2,4 mlrd teńge turatyn múlkine tyıym salyndy. Bes kúdikti qamaýǵa alynyp, úsheýine úıqamaq túrindegi bultartpaý sharasy qoldanyldy.
Qylmystyq is sotqa joldandy. Qazaqstan Respýblıkasynyń Qylmystyq-protsestik kodeksiniń 201-babyna sáıkes ózge aqparat jarııalaýǵa jatpaıdy.
Eske sala keteıik, buǵan deıin ShQO-da 356 mln teńgeni qolma-qol aqshaǵa aınaldyrǵan toptyń isi sotqa joldanǵanyn jazǵan edik.
