Aqtóbede júk kóligi qaǵyp ketken júrginshi mert boldy
AQTÓBE. QazAqparat – Aqtóbede belgilenbegen jerden joldy kesip ótpek bolǵan júrginshini júk kóligi qaǵyp ketti. Ol aýrýhanada mert boldy, dep habarlaıdy QazAqparat tilshisi.
Aqtóbe qalasyndaǵy Ońtústik aınalma jolda jol-kólik oqıǵasy boldy. 44 jastaǵy qala turǵyny túnde joldy kesip ótpek bolyp, júk kóliginiń astyna túsip qaldy.
«Júk kóliginiń júrgizýshisi – Túrkııa azamaty. Ol Ońtústik aınalma jolmen júrgen kezde áıeldi qaǵyp ketti. Jol-kólik oqıǵasy saldarynan jaıaý júrginshi jedel járdem aýrýhanasynyń jansaqtaý bólimine jatqyzyldy. Zardap shekken júrginshi esin jımastan aýrýhana tóseginde kóz jumdy. Atalǵan fakti boıynsha QR QK 345-baby 3-bóligi boıynsha sotqa deıingi tergeý bastaldy», - dep habarlady oblystyq PD baspasóz qyzmetiniń jetekshisi Erbolat Sarqulov.
