Aqtóbede «Jubanovtar álemi» mádenıet ortalyǵy ashyldy
Metsenat Qaırat Máıtekov «Jubanovtar álemi» mádenıet ortalyǵyn 100 kúnde salyp bitirdi. Ortalyq aqyn-jazýshy, sýretshi men mýzykanttardy tárbıelep, aǵa urpaqtyń jınalatyn, basqosatyn ornyna aınalmaq. Buǵan deıin habarlaǵanymyzdaı, munda Jubanovtar áýletine arnalǵan mýzeı jabdyqtalyp jatyr. 
Jańa ortalyqtyń ashylýyna aqyn Aqushtap Baqtygereeva, kompozıtor Tólegen Muhamedjanov, bıologııa ǵylymdarynyń doktory, akademık Ajar Ahmetova men fılologııa ǵylymdarynyń doktory, professor Asqar Jubanov qatysty.
«Jubanovtar otbasy - Qazaqstannyń altyn qory. Ókinishke qaraı, mundaı otbasy Qazaqstanda ázirge joq. Bizdiń armanymyz - osyndaı otbasynyń ómirge kelýi, ásirese, Aqtóbe jerinde. Aqtóbeniń topyraǵy qasıetti. Qazaq otbasy osy áýletten úlgi alýy kerek. Sondyqtan «Jubanovtar álemi» ortalyǵynda kompozıtor, jazýshy, aqyn, sýretshi sekildi shyǵarmashylyq odaqtyń músheleri otyrýy tıis. Osy jerde jaqsy án, jyr jazylyp, sýretter salynýy qajet. Dımashtyń da Aqtóbe jerinen shyǵýy tegin emes. Ol da bir tarıhı oqıǵa. Aldaǵy ýaqytta pikir almasý alańy oıdy damytýǵa, shyǵarmashylyqty shyńdaýǵa septigin tıgizedi degen senim bar»,- dedi Aqtóbe oblysynyń ákimi Berdibek Saparbaev.
«Jubanovtar álemi» ortalyǵynda Jubanovtar áýletiniń murajaıy bar. Munda Qudaıbergen, Ahmet, Ǵazıza Jubanovtardyń kózi tirisinde jaryq kórgen kitaptarymen qosa, fotoqujattar, notalar, plastınkalar saqtalǵan.
«Jubanovtar áýleti úshin bul erekshe kún. Bul jerde ata-anamyz, baýyrlarymyz týyp-ósip, Aqtóbeden shyqqan ul-qyzdar ózderiniń myqty ekenin kórsetti. Ortalyq ishinde kontsert zaly bar, mýzeı jabdyqtalyp jatyr. Aldaǵy ýaqytta ortalyq oıy bir adamdardy jınap, rýhanı azyq alatyn jerge aınalady»,- dedi akademık Ahmet Jubanovtyń qyzy Ajar Jubanova.
Sharaǵa qatysýshylar sondaı-aq «Jyr jazamyn júregimmen» atty respýblıkalyq aqyndar músháırasynyń jeńimpazdaryn marapattady.
